నాగర్ కర్నూల్ టౌన్, వెలుగు: వివిధ శాఖల అసిస్టెంట్ సెక్షన్ అధికారులు జిల్లాలోని 5 గ్రామాల్లో పర్యటించి ప్రజల జీవన ప్రమాణాలు, కేంద్ర, రాష్ట్ర ప్రభుత్వ పథకాల అమలు తీరును అధ్యయనం చేసినట్లు కలెక్టర్ ఉదయ్ కుమార్ తెలిపారు. శుక్రవారం కలెక్టరేట్ లో అడిషనల్ కలెక్టర్ కుమార్ దీపక్, కేంద్ర బృందం సభ్యులతో సమావేశమయ్యారు.
ఈ సందర్భంగా ఆయన మాట్లాడుతూ జిల్లాలోని చందుపట్ల, గన్యాగుల, అల్లాపూర్, బిజినేపల్లి, తెల్కపల్లి గ్రామాల్లో పర్యటించి గ్రామీణ ఆర్థిక, సామాజిక స్థితిగతులను పరిశీలించారని చెప్పారు. జిల్లాలో అమలు చేస్తున్న కేంద్ర, రాష్ట్ర ప్రభుత్వ పథకాలను కలెక్టర్ వివరించారు. అంతకుముందు కేంద్ర బృందం తాము పరిశీలించిన అంశాలను కలెక్టర్ దృష్టికి తీసుకెళ్లి, అనుమానాలను నివృత్తి చేసుకున్నారు.
