సిటీ అంటేనే కాంక్రీట్ జంగిల్. ఎక్కడో కాలనీల్లో గానీ పచ్చటి చెట్లు కనిపించే పరిస్థితి లేదు. దానికి తోడు పొల్యూషన్. స్వచ్ఛమైన గాలి పీల్చే పరిస్థితే లేదు. మరి, దానికి విరుగుడు లేదా..? ఇదిగో ఇంగ్లాండ్ రాజధాని లండన్ మంచి పరిష్కారాన్ని చూపించింది. చెడు గాలిని పీల్చేసి స్వచ్ఛమైన గాలినిచ్చేందుకు ఈ ‘సిటీ ట్రీస్’ను పెట్టింది. లండన్లోని వాల్దమ్ ఫారెస్ట్ మున్సిపాలిటీలో వీటిని పెట్టారు.
పొల్యూషన్ను ఫిల్టర్ చేసేలా వాటిలో మోసెస్ (గడ్డి లేదా నాచు లాంటి చిన్న చిన్న మొక్కలు)ను పెట్టారు. ఒక్కో యూనిట్.. 275 చెట్లు ఇచ్చే లాభాలను ఇస్తుందని అధికారులు చెబుతున్నారు. ఎవర్గ్రీన్ అనే సంస్థతో కలిసి ఈ సిటీ ట్రీస్ను పెట్టింది మున్సిపాలిటీ. వీటిని బయోటెక్ ఫిల్టర్లుగా చెబుతున్నారు. అంతేకాదు, ప్రపంచంలో పెట్టిన ఫస్ట్ బయోటెక్ ఫిల్టర్లుగానూ మున్సిపాలిటీ అధికారులు ప్రమోట్ చేస్తున్నారు. ఈ ఫిల్టర్లో పెట్టిన మోసెస్, కాలుష్య కారకాలను పీల్చేసి, గాలిని స్వచ్ఛంగా మార్చేస్తుందని చెబుతున్నారు. ఇందులో వాటర్ ట్యాంకు, ఇరిగేషన్ సిస్టమ్స్తో పాటు మోసెస్ పెరుగుదలను ఎప్పటికప్పుడు చెక్చేసే సెన్సర్లనూ ఏర్పాటు చేశారు. అది పనిచేసేందుకు అవసరమయ్యే పవర్ కోసం వాటిలో బ్యాటరీలతో పాటు సోలార్ పానెళ్లను పెట్టారు. ఆ పవర్ను వాడుకుంటూ గాల్లోని కార్బన్ డయాక్సైడ్, నైట్రోజన్ ఆక్సైడ్ పొల్యూటెంట్లను సిటీ ట్రీస్ తీసేస్తాయి. గత ఏడాది ఏప్రిల్లో వాల్దమ్ ఫారెస్ట్ ఏరియాలో పొల్యూషన్ కారణంగా ఎమర్జెన్సీ కూడా ప్రకటించారు. అందుకే కాలుష్యం నుంచి జనానికి రిలీఫ్ ఇచ్చేలా ఇప్పుడు ఈ సిటీ ట్రీస్ను ఏర్పాటు చేశారన్నమాట.
