యాదాద్రి, వెలుగు : 'సమ్కక్కా.. ఆరోగ్యం ఎలా ఉంది..? టైముకు తింటూ గోలీలు వేసుకుంటున్నవా..? పౌష్టికాహారం తీసుకుంటే బిడ్డ ఆరోగ్యంగా పుడతాడు' అని కలెక్టర్ హనుమంతరావు అన్నారు. అమ్మకు భరోసా కార్యక్రమంలో భాగంగా బుధవారం మోత్కూరులోని గర్భిణి గంధం సమక్క ఇంటికి కలెక్టర్ వెళ్లి న్యూట్రిషన్ కిట్అందించారు. ఆమె ఆరోగ్యంపై ఆరా తీసి ఆర్థిక పరిస్థితులను అడిగి తెలుసుకున్నారు. ప్రైవేట్ హాస్పిటల్కు వెళ్లి డబ్బు ఖర్చు చేసుకోవద్దని, గవర్నమెంట్ హాస్పిటల్కు వెళ్లాలని సూచించారు.
కనీసం వారానికి రెండుమార్లు పప్పుతో కలిసి ఆకు కూరలు తీసుకోవాలని సూచించారు. పల్లీలు బెల్లంతో కలిపి, ఖర్జూరాలు, డ్రైఫ్రూట్స్ తీసుకోవాలన్నారు. డాక్టర్ సూచన మేరకు ఐరన్ ట్యాబ్లెట్స్ లేదా ఇంజక్షన్ రూపంలో తీసుకోవడం మంచిదన్నారు. అనంతరం మోత్కూరు పీహెచ్సీని సందర్శించి ఓపీ వివరాలను అడిగి తెలుసుకున్నారు. మెడిసిన్ అందుబాటులో ఉండేలా చర్యలు తీసుకోవాలన్నారు. అనంతరం నిర్మాణంలో ఉన్న ఇందిరమ్మ ఇండ్లను పరిశీలించి, త్వరగా నిర్మాణం పూర్తి చేసుకోవాలని కలెక్టర్ సూచించారు.
