- శిక్షణ కార్యక్రమంలో ఎన్నికల అధికారి, కలెక్టర్ కుమార్ దీపక్
నస్పూర్, వెలుగు: పంచాయతీ ఎన్నికల నిర్వహణలో నామినేషన్ ప్రక్రియను సజావుగా చేపట్టాలని మంచిర్యాల జిల్లా ఎన్నికల అధికారి, కలెక్టర్ కుమార్ దీపక్ ఆదేశించారు. శుక్రవారం కలెక్టరేట్లో బెల్లంపల్లి సబ్ కలెక్టర్ మనోజ్, అడిషనల్ ఎన్నికల అధికారి, జిల్లా పంచాయతీ అధికారి వెంకటేశ్వర్ రావు, నోడల్ అధికారి శంకర్తో కలిసి రిటర్నింగ్, సహాయ రిటర్నింగ్ అధికారులకు పంచాయతీ ఎన్నికల నిర్వహణ, నామినేషన్ ప్రక్రియపై ఏర్పాటు చేసిన శిక్షణ కార్యక్రమంలో పాల్గొన్నారు.
ఈ సందర్భంగా ఆయన మాట్లాడుతూ.. పంచాయతీ ఎన్నికల నిర్వహణకు సంబంధించి అధికారులకు శిక్షణ ఇస్తున్నామని తెలిపారు. ఎన్నికల నోటిఫికేషన్, నామినేషన్, నామినేషన్ల పరిశీలన, పోటీలో ఉండే అభ్యర్థుల తుది జాబితా, పోస్టల్ బ్యాలెట్ పంపిణీ, ఫోటో ఓటర్ స్లిప్పుల పంపిణీ, మోడల్ కోడ్ ఆఫ్ కండక్ట్, పోలింగ్ కేంద్రాల్లో ఏర్పాట్లు, ఓటింగ్ నిర్వహణ ప్రక్రియ, ఫలితాలు వంటి ప్రతి అంశంపై అప్రమత్తంగా ఉండాలన్నారు.
ఎన్నికల గుర్తుల కేటాయింపుతో జాగ్రత్తలు వహించాలని, హెల్ప్డెస్క్ ఏర్పాటు చేయాలని సూచించారు. విధుల్లో ఉండే అధికారులు ఎలాంటి పొరపాట్లకు తావు లేకుండా ఎన్నికల ప్రక్రియ సజావుగా నిర్వహించాలని, ఎన్నికల ప్రవర్తన నియమావళి ఖచ్చితంగా పాటించాలని ఆదేశించారు. ట్రైనింగ్ను సద్వినియోగం చేసుకోవాలని.. అనుమానాలు, అపోహలు నివృత్తి చేసుకోవాలన్నారు. కార్యక్రమంలో మాస్టర్ ట్రైనర్లు, సంబంధిత అధికారులు పాల్గొన్నారు
