విజయానికి వైకల్యం అడ్డు కాదు : కలెక్టర్ ప్రావీణ్య

విజయానికి వైకల్యం అడ్డు కాదు : కలెక్టర్ ప్రావీణ్య

సంగారెడ్డి టౌన్, వెలుగు: దివ్యాంగులు అన్ని రంగాల్లో తమ ప్రతిభను చాటుతున్నారని కలెక్టర్ ప్రావీణ్య అన్నారు. అంతర్జాతీయ దివ్యాంగుల దినోత్సవం పురస్కరించుకొని సంగారెడ్డిలోని అంబేద్కర్ స్టేడియంలో మహిళా శిశు సంక్షేమ శాఖ ఆధ్వర్యంలో శనివారం జిల్లాస్థాయి దివ్యాంగుల క్రీడా పోటీలను నిర్వహించారు. కలెక్టర్ మాట్లాడుతూ వైకల్యం విజయానికి అడ్డు కాదని పట్టుదల, ఆత్మవిశ్వాసంతో అనుకున్నది సాధించాలని ప్రోత్సహించారు. 

ప్రభుత్వం అందరి కోసం సమాన అవకాశాలు, సదుపాయాలు కల్పించేందుకు కట్టుబడి ఉందన్నారు. క్రీడలు దివ్యాంగుల్లో ఆత్మవిశ్వాసాన్ని పెంచడంతోపాటు వారిలోని ప్రతిభను వెలుగులోకి తెస్తాయన్నారు. వీరి కోసం ప్రత్యేకంగా ఏర్పాటు చేసిన రన్నింగ్ షాట్ పుట్, వీల్ చైర్ రేస్ ఇండోర్ గేమ్స్ నిర్వహించారు. ఆయా పోటీలను కలెక్టర్ ప్రత్యేకంగా దగ్గరుండి పరిశీలించడంతోపాటు క్రీడాకారులను ప్రోత్సహించారు. కార్యక్రమంలో డీడబ్ల్యూవో లలిత కుమారి, యువజన సంక్షేమ అధికారి కాసిం బేగ్, డీఎంహెచ్​వో వసంతరావు ,అధికారులు, కోచ్ లు, వలంటీర్లు పాల్గొన్నారు.

మెదక్​టౌన్:  విజయానికి వైకల్యం అడ్డుకాదని అడిషనల్​ కలెక్టర్​ నగేశ్ అన్నారు. అంతర్జాతీయ దివ్యాంగుల దినోత్సవం సందర్భంగా మెదక్​ పట్టణంలోని ఇందిరాగాంధీ స్టేడియంలో సంక్షేమ శాఖ ఆధ్వర్యంలో దివ్యాంగుల పిల్లలకు క్రీడాపోటీలను నిర్వహించారు. ఈ సందర్భంగా ఆయన మాట్లాడుతూ  వైకల్యం శరీరానికి తప్ప మనసుకు కాదన్నారు. దివ్యాంగులు అన్ని రంగాల్లో రాణించి ప్రథమ స్థానంలో నిలుస్తున్నారన్నారు. ఈ సందర్భంగా రన్నింగ్​, షాట్ ఫుట్, చెస్, జావెలిన్ త్రో, క్యారమ్ క్రీడలను నిర్వహించారు. కార్యక్రమంలో డీడబ్ల్యువో హేమభార్గవి, సీడీపీవో స్వరూప, సంక్షేమ శాఖ సిబ్బంది, దివ్యాంగుల సంక్షేమ శాఖ యూనియన్ నాయకులు, దివ్యాంగులు పాల్గొన్నారు.