రామాయంపేట, వెలుగు: సర్పంచ్, వార్డుల పదవులకు వేలం వేసినా, పోటీ చేసిన అభ్యర్థులను ఒత్తిడి, భయభ్రాంతులకు గురిచేసినా క్రిమినల్ కేసులు నమోదు చేస్తామని కలెక్టర్ రాహుల్రాజ్హెచ్చరించారు. శనివారం రామాయంపేట మండలంలో పర్యటించారు. పోలింగ్స్టేషన్ను సందర్శించి అక్కడున్న అధికారులకు పలు సూచనలు, సలహాలు ఇచ్చారు. ఎన్నికల ఖర్చులన్నీ నూతన బ్యాంక్ అకౌంట్ లోనే నమోదు చేయాలన్నారు. రేపటి నుంచి రెండో విడత నామినేషన్ ప్రక్రియ ప్రారంభమవుతుందని చెప్పారు. 8 మండలాల్లో 149 గ్రామ పంచాయతీలకు, 1,290 వార్డులకు నామినేషన్లు స్వీకరిస్తామన్నారు.
ధాన్యం కొనుగోళ్లను స్పీడప్ చేయాలి
నిజాంపేట: ధాన్యం కొనుగోళ్లను వేగవంతం చేయాలని కలెక్టర్ రాహుల్ రాజ్ సూచించారు. మండల పరిధిలోని చల్మెడ గ్రామంలో పీఏసీఎస్ రామాయంపేట ఆధ్వర్యంలో ఏర్పాటు చేసిన కొనుగోలు సెంటర్ ను పరిశీలించారు. కలెక్టర్ మాట్లాడుతూ.. కొనుగోలు కేంద్రాల్లో రైతులకు ఇబ్బందులు లేకుండా చూడాలన్నారు. తాగునీరు, మౌలిక సదుపాయాలు, టార్ఫాలిన్లు, గోనె సంచులు, తూకం యంత్రాలు, తేమ యంత్రాలు, ప్యాడీ క్లీనర్లు సమకూర్చాలన్నారు. అధికారులు తమ పరిధిలోని కొనుగోలు కేంద్రాలను ప్రతి రోజు సందర్శించాలని, ధాన్యం కొనుగోలు ప్రక్రియను వేగవంతం చేయాలని ఆదేశించారు. కలెక్టర్ వెంట ఆర్డీవో రమాదేవి, తహసీల్దార్ శ్రీనివాస్, పాల్గొన్నారు.
