చండూరు (మర్రిగూడ)వెలుగు: గ్రామ పంచాయతీ ఎన్నికల్లో భాగంగా మొదటి విడత ఎన్నికల నామినేషన్ల స్వీకరణ ప్రక్రియ పారదర్శకంగా నిర్వహించాలని నల్గొండ కలెక్టర్ ఇలా త్రిపాఠి అన్నారు. శుక్రవారం ఆమె మర్రిగూడ మండలం, సరంపేట, శివన్న గూడెం, వట్టిపల్లి గ్రామాల్లో పర్యటించి నామినేషన్ స్వీకరణ కేంద్రాలను తనిఖీ చేశారు. నామినేషన్ దాఖలు ప్రక్రియ, సిబ్బంది హాజరు, అభ్యర్థులకు కల్పిస్తున్న సేవలు, భద్రత ఏర్పాట్లను పరిశీలించారు.
ప్రతి కేంద్రంలో క్రమశిక్షణ, నిబంధనలు కచ్చితంగా పాటించాలని, రిజర్వేషన్లను కల్పించిన వారికి సర్టిఫికెట్ల పరిశీలన, మహిళా అభ్యర్థుల కోసం ప్రత్యేక సహాయ డెస్క్‌ల ఏర్పాటు, అభ్యర్థులు కరెంట్ బ్యాంకు ఖాతా సమర్పించాల్సి ఉంటుందని తెలిపారు. అభ్యర్థులు సమర్పించే నగదును ఎలా స్వీకరిస్తున్నారని అడిగారు. డిజిటల్ గోడ గడియారం అమర్చుకోవాలని చెప్పారు. చెక్ లిస్టులను నామినేషన్ వివరాలను అడిగి తెలుసుకున్నారు. వచ్చిన నామినేషన్లను టీ పోల్ యాప్ లో అప్లోడ్ చేయాలని చెప్పారు. తాగునీటి సౌకర్యం, వికలాంగుల కోసం ర్యాంపులు, వీల్ చైర్లు ఏర్పాటు చేసుకోవాలన్నారు. ప్రతి అభ్యర్థి ఇబ్బందిలేకుండా నామినేషన్ దాఖలు చేసేలా చూడాలన్నారు. వీరి వెంట చండూరు ఆర్డీవో శ్రీదేవి, తహసీల్దార్ శ్రీనివాస్, ఎంపీడీవో మున్నయ్య, తదితరులు ఉన్నారు.
