నిజామాబాద్, వెలుగు: అసెంబ్లీ ఎన్నికల ఓట్ల లెక్కింపు రోజు జిల్లాలో మద్యం, కల్లు అమ్మకాలను నిషేధించినట్లు పోలీస్ కమిషనర్ కల్మేశ్వర్ సింగన్వార్ తెలిపారు. ఆదివారం పొద్దున 6 గంటల నుంచి సోమవారం పొద్దున 6 గంటల వరకు ఎక్కడా మద్యం అమ్మరాదన్నారు. వైన్స్, బార్, కల్లు దుకాణాలు మూసి ఉంచాలన్నారు.ఈ మేరకు ఆయన శుక్రవారం ప్రకటన విడుదల చేశారు. కౌంటింగ్జరిగే పాలిటెక్నిక్ కాలేజీకి కిలోమీటర్ దూరంలో ప్రజలు గుమిగూడొద్దన్నారు.
144 సెక్షన్అమలులో ఉంటుందని స్పష్టం చేశారు. ముందు జాగ్రత్త చర్యలో భాగంగా సమస్యాత్మక ప్రాంతాల్లో రిజల్ట్ రోజు అల్లర్లు జరగకుండా పోలీస్ పికెటింగ్ ఏర్పాటు చేస్తున్నామన్నారు. రిటర్నింగ్ ఆఫీసర్ జారీ చేసిన పాస్తోనే కౌంటింగ్ సెంటర్లలోకి వెళ్లాలని, సెల్ఫోన్లు, అగ్గిపెట్టెలు, లైటర్లను లోనికి అనుమతించమన్నారు. పటాకులు కాల్చడంపై కూడా నిషేధం అమలులో ఉంటుందని, ఆదివారం ఎక్కడా విజయోత్సవ ర్యాలీలు తీయడానికి వీలులేదన్నారు. పోలీసుల రాతపూర్వక పర్మిషన్ ఉంటేనే సోమవారం ర్యాలీలు తీయాలన్నారు. నిబంధనలు ఉల్లంఘిస్తే కేసులు నమోదు చేస్తామని హెచ్చరించారు.
