- ఇద్దరి నడుమ లోకల్, నాన్లోకల్ వార్
- పాలమూరులో జోరుగా కాంగ్రెస్, బీజేపీ క్యాంపెయిన్
- ఎన్నికల ప్రచారం మొదలుపెట్టని బీఆర్ఎస్
మహబూబ్నగర్, వెలుగు : పాలమూరు కాంగ్రెస్, బీజేపీ ఎంపీ క్యాండిడేట్లు వంశీచంద్ రెడ్డి, డీకే అరుణ మధ్య కొద్ది రోజులుగా మాటల యుద్ధం నడుస్తోంది. జనవరిలో వంశీచంద్ రెడ్డి కామెంట్లు చేయగా, ఇందుకు ప్రతిగా డీకే అరుణ కూడా కామెంట్ చేశారు. వీరిద్దరినే రెండు పార్టీల హైకమాండ్లు క్యాండిడేట్లుగా అనౌన్స్ చేయడంతో వీరి మధ్య మాటల యుద్ధం పీక్స్కు చేరింది. ఇటీవల జరిగిన ఓ సమావేశంలో డీకే అరుణ ‘పాలమూరుకు ముఖ పరిచయం లేని వాళ్లు, ఇక్కడి ప్రజలతో అనుబంధం లేని వాళ్లు ఓట్లు అడిగేందుకు వస్తున్నారు. ప్రజలు ఆలోచించి ఓట్లు వేయాలి.
కాంగ్రెస్ క్యాండిడేట్ను గతంలో ఎమ్మెల్యేగా చేసింది నేనే. నేను లేకుంటే ఆయనకు రాజకీయ భవిష్యత్ లేదు' అంటూ వంశీని టార్గెట్ చేస్తూ కామెంట్ చేశారు. ఇందుకు ప్రతిగా వంశీ మాట్లాడుతూ ‘నన్ను నాన్ -లోకల్ అంటున్నారు కదా! మీరు ఏ స్థానికత ప్రాతిపదికన పాన్గల్ నుంచి జడ్పీటీసీగా పోటీ చేశారు? నేనే పక్కా లోకల్. కల్వకుర్తి శేరిఅప్పరెడ్డిపల్లిలో పుట్టిన ఉమ్మడి పాలమూరు జిల్లా బిడ్డను. నేను నాన్-లోకల్ అయితే గుజరాత్కు చెందిన నరేంద్ర మోదీ వారణాసి నుంచి
హుజారాబాద్కు చెందిన ఈటల రాజేందర్ మల్కాజ్గిరి నుంచి ఎలా పోటీ చేస్తారు? ఈ విషయంలో డీకే అరుణ నాకు బహిరంగ క్షమాపణ చెప్పాలి' అని ఆయన డిమాండ్ చేశారు. వీరిద్దరి మధ్య ప్రతిరోజు మాటల యుద్ధం నడుస్తుండటంతో పాలమూరులో రాజకీయం వేడెక్కుతోంది.
కనిపించని బీఆర్ఎస్..
పోలింగ్కు ఇంకా 48 రోజుల గడువే ఉంది. ఇప్పటికే కాంగ్రెస్, బీజేపీలు ప్రచారంలో దూసుకుపోతున్నాయి. కానీ, బీఆర్ఎస్ నుంచి ఇంత వరకు ఆ పార్టీ క్యాండిడేట్, సిట్టింగ్ ఎంపీ మన్నే శ్రీనివాస్రెడ్డి ఎన్నికల ప్రచారాన్ని ప్రారంభించలేదు. వాస్తవానికి ఈ స్థానం నుంచి ఈయన కాకుండా ఉమ్మడి జిల్లాకు చెందిన ఇద్దరు లీడర్లు పోటీ చేస్తారనే టాక్ నడిచింది. వీరిద్దరిలో ఎవరో ఒకరుపోటీ చేయాలని హైకమాండ్ సూచించినట్లు సమాచారం.
కానీ, వారు పోటీకి వెనకడుగు వేయడంతో తప్పనిసరి పరిస్థితుల్లో హైకమాండ్ తిరిగి సిట్టింగ్ ఎంపీనే పార్టీ క్యాండిడేట్గా ప్రకటించింది. అయితే, గతం నుంచి ఈయన పోటీకి సుముఖంగా లేరనే వార్తలు వస్తున్నాయి. పార్టీ అధికారంలో ఉన్న సమయంలో సొంత పార్టీ లీడర్లే సపోర్ట్ చేయకపోవడంతో, ఈయన నిరుత్సాహంలో ఉన్నట్లు అప్పట్లో పబ్లిక్లో జోరుగా చర్చలు జరిగాయి. ప్రస్తుత ఎన్నికల్లో ఈయనకు పోటీ చేసే ఆసక్తి లేకున్నా.. హైకమాండ్ బలవంతంగా ఒప్పించిందనే టాక్ నడుస్తోంది.
కాంగ్రెస్, బీజేపీ పోటాపోటీగా..
పాలమూరు పార్లమెంట్ పరిధిలో కాంగ్రెస్ క్యాండిడేట్ చల్లా వంశీచంద్రెడ్డి, బీజేపీ క్యాండిడేట్ డీకే అరుణ పోటాపోటీగా ప్రచారం చేస్తున్నారు. ప్రతి ఓటును కీలకంగా భావిస్తున్నారు. ఈ క్రమంలో రోజూ ఓటర్లను కలిసేలా షెడ్యూల్ రూపొందించుకుంటున్నారు. కాంగ్రెస్ క్యాండిడేట్ వంశీచంద్రెడ్డి మార్నింగ్ వాక్ పేరుతో ఓటర్లను కలిసే ప్రయత్నం చేస్తున్నారు. స్థానిక ఎమ్మెల్యే యెన్నం శ్రీనివాస్రెడ్డితో కలిసి పర్యటిస్తున్నారు.
యూత్ ఓటర్లను కలిసి ప్రభుత్వం నుంచి వారు ఏం ఆశిస్తున్నారనే దానిపై చర్చిస్తున్నారు. సీనియర్ సిటిజన్లను పలుకరించి, వారితో రాష్ట్ర, జాతీయ రాజకీయాలపై చర్చిస్తున్నారు. బీజేపీ క్యాండిడేట్ డీకే అరుణ కూడా ప్రచారం షురూ చేశారు. క్రికెట్ పోటీలకు చీఫ్ గెస్ట్గా హాజరై వారితో మాట్లాడుతున్నారు. ఉదయం, సాయంత్రం జిల్లా కేంద్రంలోని ప్లే గ్రౌండ్లకు వెళ్లి మహిళలు, సీనియర్ సిటిజన్లు, యూత్తో మాట్లాడుతున్నారు.
