న్యూఢిల్లీ, వెలుగు: ఇన్ఫర్మేషన్ టెక్నాలజీ ఇన్వెస్ట్మెంట్ రీజియన్ (ఐటీఐఆర్) విషయంలో తెలంగాణ ప్రభుత్వం కేంద్రాన్ని దోషిగా చూపిస్తోందని కాంగ్రెస్ సీనియర్ నేత పొన్నాల లక్ష్మయ్య విమర్శించారు. అసలు.. ఐటీ శాఖ మంత్రి కేటీఆర్కు, రాష్ట్ర ప్రభుత్వానికి ఐటీఐఆర్ అంటే ఏంటో తెలుసా? పూర్తి అవగాహన ఉందా? అని పొన్నాల ప్రశ్నించారు. ఢిల్లీలోని తెలంగాణ భవన్లో ఆదివారం ఆయన మీడియాతో మాట్లాడారు. ఐటీఐఆర్ ప్రాజెక్టు హైదరాబాద్ లోనే మొదటిది కావాలని అప్పటి కేంద్రాన్ని ఒప్పించి ప్రణాళిక ముందు ఉంచామన్నారు. అయితే తెలంగాణ ప్రభుత్వం ఆ ప్రాజెక్ట్ ను నీరు గార్చిందని విమర్శించారు. కేంద్రం నిధులివ్వడం లేదని ఉద్యోగ కల్పన మానేస్తారా? అని నిలదీశారు. ఈ ప్రాజెక్టుతో 25 ఏండ్లలో 15.50 లక్షల మందికి ప్రత్యక్షంగాను, 55 లక్షల మందికి పరోక్షంగాను ఉపాధి లభిస్తుందన్నారు. 3 లక్షల కోట్ల ఐటీ పెట్టుబడులకు సంబంధించిన ప్రాజెక్ట్ అని గుర్తు చేశారు. 8ఏండ్లలో ఏడాదికి రూ.2 వేల కోట్లు రాష్ట్రం ఖర్చు చేస్తే అయిపోయేదని పొన్నాల అన్నారు.
