సీకులకు తుప్పు.. బేస్మెంట్లకు పగుళ్లు

పాలమూరు జిల్లాలో డబుల్ బెడ్రూమ్ ఇండ్ల పనులు ఏడియాడనే

మహబూబ్నగర్, వెలుగు : డబుల్ బెడ్రూమ్ ఇండ్ల నిర్మాణాలు ముందు పడట్లేదు. కొన్ని మండలాల్లో శంకుస్థాపన చేసి మూడేండ్లు కావస్తున్నా, పిల్లర్ల దశ దాటలేదు. దీనికితోడు పిల్లర్ల కోసం ఏర్పాటు చేసిన సీకులు వర్షానికి తడిసి, ఎండకు ఎండి తుప్పుపట్టాయి. కొన్ని చోట్ల భూమికి, బేస్మెంట్కు మధ్య గ్యాప్ రావడంతో, వీటిని కంప్లీట్ చేసినా పనికిరావని అంటున్నారు.

ఏండ్లుగా పెండింగ్..

జిల్లాలోని పాలమూరు, దేవరదక్ర, జడ్చర్ల నియోజకవర్గాల్లో 8,768 డబుల్ బెడ్రూమ్ ఇండ్ల నిర్మాణానికి అనుమతి వచ్చింది. ఐదేండ్లు కావస్తున్నా సగం ఇండ్లు కూడా కంప్లీట్ కాలేదు. ఇప్పటి వరకు 4,321 ఇండ్లు పూర్తి కాగా, 2,125 వివిధ దశల్లో ఉండగా, 2,322 ఇళ్ల నిర్మాణాలు ప్రారంభించలేదు. ప్రధానంగా హన్వాడ మండల కేంద్రంతో పాటు యారోనిపల్లి, బుద్దారం, గుడిమల్కాపూర్ గ్రామాల్లో ఇండ్ల నిర్మాణాలకు శంకుస్థాపన చేశారు. పిల్లర్లు, బేస్మెంట్ వరకు పనులు చేసి వదిలేశారు.గుడిమాల్కాపూర్లో కొద్ది రోజుల కింద పనులు ఆగిపోగా, ఇటీవల పనులు ప్రారంభమయ్యాయి. మహబూబ్నగర్ రూరల్ మండలం మాచన్పల్లి, చౌదర్పల్లి, ఓబులాయిపల్లి గ్రామాల్లో 32 ఇండ్ల చొప్పున, అడవి వెంకటపూర్లో 64, కోడూరులో 45 ఇండ్లను కడుతున్నారు.

వీటిలో కొన్ని పూర్తయినా, అర్హులకు అందజేయలేదు. కోడూరులో ప్లాస్టరింగ్, టైల్స్ పనులు జరుగుతున్నాయి. మాచన్పల్లి, ఓబులాయపల్లి, వెంకటపూర్లో డోర్ల ఫిట్టింగ్, టైల్స్ పనులు కొనసాగుతున్నాయి. జడ్చర్ల నియోజకవర్గానికి 2,700 ఇండ్లు మంజూరు చేస్తే, 540 ఇండ్లను పంపిణీ చేశారు. నవాబుపేట మండల కేంద్రంలో 100 ఇండ్లకు స్లాబ్ వేసి వదిలేశారు. యన్మన్గండ్లలో 48 , రుద్రారంలో 24 ఇండ్లను పూర్తి చేసినా లబ్ధిదారులకు ఇవ్వలేదు. బాలానగర్ మండలంలోని గౌతపూర్లో 64, పెద్దయ్యపల్లిలో 40 ఇండ్లు కట్టించి పంపిణీ చేయలేదు. మిడ్జిల్ మండలకేంద్రంలో ఇండ్ల కోసం స్థలాన్ని కేటాయించి, శిలాఫలకాన్ని ఆవిష్కరించారు. హైటెన్షన్ వైర్లు ఉన్నాయనే కారణంతో పనులు ప్రారంభించలేదు. వేరే ప్రాంతంలో స్థల సేకరణ చేయాల్సి ఉన్నా, ఆ దిశగా చర్యలు తీసుకోలేదు. గండీడ్, మహమ్మదాబాద్, కోయిల్కొండ మండలాల్లో ఇప్పటి వరకు పనులు ప్రారంభించలేదు.

ఉన్నవే కట్టలే..

జిల్లా వ్యాప్తంగా ఇంకా 4,447 ఇండ్లు కంప్లీట్ చేయాల్సి ఉంది. అయితే డిసెంబరు 4న పాలమూరులో పర్యటించిన సీఎం కేసీఆర్ నియోజకవర్గానికి వెయ్యి ఇండ్లు మంజూరు చేస్తామని ప్రకటించారు. 15 రోజుల్లో కార్యాచరణ కూడా ప్రారంభిస్తామని హామీ ఇచ్చారు. కానీ, ఇంత వరకు సీఎం చెప్పినట్లు అదనపు ఇండ్లు మంజూరు కాలేదు. ప్రస్తుతం ఐరన్, సాండ్, సిమెంట్
తదితర మెటీరియల్ ధరలు పెరిగాయి. దీంతో కాంట్రాక్టర్లు పనులను కంప్లీట్ చేయడానికి ముందుకు రావడం లేదని అంటున్నారు.

ఇండ్లు ఎప్పుడిస్తరో?

నవాబ్పేటలో డబుల్ బెడ్రూమ్ ఇండ్ల పనులు స్టార్ట్ చేసిన మూడేండ్లు అవుతోంది. సగం పనులు కూడా కంప్లీట్ చేయలేదు. ఈ ఇండ్లను ఎప్పుడు కడ్తరో? మాకు ఎప్పుడిస్తరో? అర్థం కావడం లేదు.

- కొట్ల రాజు, నవాబుపేట