మధిర, వెలుగు: ఖమ్మం జిల్లా మధిర తహసీల్దార్ ఆఫీస్లో శుక్రవారం ఏర్పాటు చేసిన కల్యాణ లక్ష్మి చెక్కుల పంపిణీ ఉద్రిక్తతకు దారితీసింది. ఎమ్మెల్యే మల్లు భట్టి విక్రమార్క, జడ్పీ చైర్మన్ లింగాల కమల్రాజు ఒకరిపై ఒకరు మాటల యుద్ధానికి దిగడంతో టీఆర్ఎస్, కాంగ్రెస్ కార్యకర్తల మధ్య తోపులాట చోటుచేసుకుంది. భట్టి జిందాబాద్.. అంటూ కాంగ్రెసోళ్లు, జై లింగాల.. జై కేసీఆర్.. అంటూ టీఆర్ఎసోళ్లు బాహాబాహికి దిగారు. ఉదయం 11గంటలకు సభ స్టార్ట్కావాల్సి ఉండగా ముఖ్య అతిథి అయిన ఎమ్మెల్యే భట్టి విక్రమార్క ఆలస్యంగా వచ్చారు. అనంతరం జడ్పీ చైర్మన్ కమల్ రాజు మాట్లాడుతూ ఎమ్మెల్యే భట్టి విక్రమార్క సమయపాలన పాటించాలని, సకాలంలో లబ్ధిదారులకు చెక్కులు పంపిణీ చేయాలని సూచించారు. భట్టి మాట్లాడుతూ రాష్ట్ర బడ్జెట్లో డబ్బులు లేక చెక్కులు ఇన్టైంలో మంజూరు కావడం లేదన్నారు. మంజూరైన కల్యాణలక్ష్మి చెక్కులను లేట్కాకుండా అందజేయాలని తహసీల్దార్కు గతంలోనే చెప్పామన్నారు. అంతలోకి జడ్పీ చైర్మన్ మధ్యలో కలుగజేసుకుని మండల ప్రజాప్రతినిధులు లేకుండా చెక్కులు ఎలా పంపిణీ చేస్తారని ప్రశ్నించడంతో అక్కడే ఉన్న టీఆర్ఎస్, కాంగ్రెస్కార్యకర్తలు వాగ్వాదానికి దిగారు. మధిర ట్రైనీ ఎస్సై షకీర్ సిబ్బందితో అక్కడికి చేరుకుని ఇరువర్గాలకు సర్దిచెప్పారు. అనంతరం 46 మందికి కల్యాణ లక్ష్మి చెక్కులు పంపిణీ చేశారు.
