విశాఖపట్నం: పశ్చిమ మధ్య బంగాళాఖాతంలో కేంద్రీకృతమైన అత్యంత తీవ్ర తుపాను ‘అర్నబ్’ వేగంగా ఆంధ్రప్రదేశ్ తీరం వైపు కదులుతోంది. గత ఆరు గంటల్లో గంటకు 25 కిలోమీటర్ల వేగంతో పశ్చిమ-వాయవ్య దిశగా పయనించిన ఈ తుపాను.. రానున్న గంటల్లో దిశ మార్చుకుని వాయవ్య దిశగా కదిలే అవకాశం ఉందని అంచనా.
విశాఖకు 300 కి.మీ. దూరంలో తుపాను
ప్రస్తుతం తుపాను విశాఖపట్నానికి ఆగ్నేయంగా 300 కిలోమీటర్లు, కాకినాడకు తూర్పు-ఆగ్నేయంగా 360 కిలోమీటర్లు, ఒడిశాలోని గోపాల్‌పూర్‌కు దక్షిణంగా 380 కిలోమీటర్ల దూరంలో కేంద్రీకృతమై ఉంది. అలాగే మచిలీపట్నానికి తూర్పుగా 460 కిలోమీటర్లు, బాపట్లకు తూర్పుగా 530 కిలోమీటర్ల దూరంలో కొనసాగుతోంది. అండమాన్ దీవుల్లోని శ్రీ విజయ పురానికి పశ్చిమ-వాయవ్యంగా 920 కిలోమీటర్ల దూరంలో ఉన్నట్లు పేర్కొంటున్నారు.
రేపు ఉదయం తీరం దాటే అవకాశం
తుపాను ఈరోజు సాయంత్రం వరకు పశ్చిమ-వాయవ్య దిశగా కదిలి, ఆ తర్వాత వాయవ్య దిశలో ప్రయాణించే అవకాశం ఉంది. రేపు ఉదయం నుంచి మధ్యాహ్నానికి ముందు సమయంలో బాపట్ల–విశాఖపట్నం మధ్య, యానాం సమీపంలో ఆంధ్రప్రదేశ్–యానాం తీరాన్ని అత్యంత తీవ్ర తుపానుగా దాటే అవకాశముందని అంచనా.తుపాను తీరం దాటే సమయంలో గంటకు 115 నుంచి 125 కిలోమీటర్ల వేగంతో బలమైన గాలులు వీచే అవకాశం ఉంది. అప్పుడప్పుడు గాలుల వేగం గంటకు 140 కిలోమీటర్ల వరకు చేరవచ్చని అంచనా వేస్తున్నారు.
తుపాను ప్రభావంతో తీర ప్రాంతాల్లో భారీ గాలులు, సముద్రం అల్లకల్లోలంగా మారడం వంటి ప్రమాదాలు పొంచి ఉండే అవకాశం ఉంది. తీర ప్రాంత ప్రజలు అప్రమత్తంగా ఉండాలి. అధికారిక వాతావరణ హెచ్చరికలను అనుసరిస్తూ, అధికారులు సూచించే ముందు జాగ్రత్త చర్యలు తీసుకోవాలి.
