మాంచెస్టర్ (యూకె): గుండెపోటు.. ఎప్పుడు, ఎవరికి వస్తుందో డాక్టర్లు కూడా చెప్పలేకపోతున్నారు. ఆరోగ్యంగా ఉన్నామని అనుకునే వాళ్లు కూడా హఠాత్తుగా గుండెపోటుతో చనిపోయిన ఘటనలు ఎన్నో! అయితే, గుండె పోటుకు గురయ్యే.. అదీ తీవ్రమైన గుండెపోటుకు గురయ్యే ముప్పు సోమవారమే ఎక్కువని ఐర్లాండ్ వైద్యులు పేర్కొన్నారు. ఐదేళ్లలో పదివేలకు పైగా గుండెపోటు బాధితుల కేసులను పరిశీలించి ఈ విషయాన్ని గుర్తించామని చెప్పారు.
ఐదేళ్ల డాటా పరిశీలన..
ఐర్లాండ్లోని బెల్ఫాస్ట్ హెల్త్ అండ్ సోషల్ కేర్ ట్రస్టుతో కలిసి రాయల్ కాలేజ్ ఆఫ్ సర్జన్స్ ఈ స్టడీ నిర్వహించారు. ఇందులో భాగంగా 10,528 మంది గుండెపోటు బాధితుల హెల్త్ డాటాను విశ్లేషించారు. 2013 నుంచి 2018 వరకు తీవ్రమైన గుండెపోటుతో ఆసుపత్రిలో చేరిన రోగుల వివరాలను పరిశీలించారు. ఇలాంటి కేసులు సోమవారమే ఎక్కువగా నమోదయ్యాయని పరిశోధకులు తెలిపారు.
వారంలో తొలి రోజుకు, ఈ గుండెపోటు కేసుల పెరుగుదలకు సంబంధం ఉందని గుర్తించామన్నారు. దీనికి కారణం జీవ గడియారంలో మార్పులేనని బ్రిటీష్ హార్ట్ ఫౌండేషన్ మెడికల్ డైరెక్టర్ ప్రొఫెసర్ నీలేశ్ సామాని పేర్కొన్నారు.
