స్ట్రీట్ డాగ్స్ కోసం ‘ఎకో బ్రిక్స్’ షెల్టర్ హోమ్స్ కడుతున్నారు ముంబై టీనేజర్స్. ప్లాస్టిక్ వేస్ట్తో నిర్మించిన ఈ హోమ్స్లో వీధి కుక్కలు వెచ్చగా బజ్జుంటున్నాయి.
ఈ టీనేజర్స్ అంతా నవీ ముంబై వాసులు. ఆ వయసు వాళ్లలా ఫ్రెండ్స్తో జాలీగా ఎంజాయ్ చేయడమే కాకుండా సేవకి కూడా సై అంటున్నారు.‘ఉర్వరి’ అనే ఎన్జీవోలో వలంటీర్లు వీళ్లంతా. కిందటి ఏడాది ‘ప్లాస్టిక్ ఫ్రీ జూలై’ సందర్భంగా ప్లాస్టిక్ వేస్ట్తో వీధి కుక్కలకి షెల్టర్ హోం నిర్మించాలనే ఆలోచన వచ్చింది. వానలో తడుస్తూ, వీధికుక్కలు వణుకుతుండడం చూశారు. వాటికంటూ ఒక చోటు ఉంటే వానలోనూ అవి వెచ్చగా, హాయిగా ఉంటాయి కదా! అనిపించింది. ఆ ఆలోచన రాగానే ప్లాస్టిక్ బాటిళ్లు, కూల్ డ్రింక్ బాటిళ్లు సేకరించారు. వాటిలో చిప్స్ ప్యాకెట్ కవర్లు, ర్యాపర్లని టైట్గా నింపుతారు. చుట్టూరా రెండు వరుసల మెష్, మధ్యలో ప్లాస్టిక్ బాటిళ్లు వరుసగా ఉండే ఈ షెల్టర్ హోమ్స్ 4.5, 3.5, 3.5 కొలతలో ఉంటుంది. ఒక షెల్టర్ హోమ్ కోసం150 ప్లాస్టిక్ బాటిళ్లు వాడతారు. ఇది దాదాపు నలభై కిలోల ప్లాస్టిక్ వేస్ట్కి సమానం.
‘ఉర్వరి’ సంస్థని 2016లో గుప్తే, ఆమె ఫ్రెండ్ ఖుషీ షా మొదలుపెట్టారు. అదే టైంలో అమెజాన్ అడవుల్లో కార్చిచ్చు వ్యాపించింది. ఆ వార్తలు చూసి పర్యావరణాన్ని కాపాడడం కోసం ఏదైనా చేయాలి అనుకున్నారు. ప్రతివారం అయిదు మొక్కలు నాటడం, ప్లాస్టిక్ వేస్ట్ని సేకరించడం వంటివి చేసేవాళ్లు. మొదట్లో ప్లాస్టిక్ వేస్ట్ని రీసైక్లింగ్కి ఇచ్చేవాళ్లు. తర్వాత వీళ్లకి ‘ఎకో బ్రిక్’ ఐడియా వచ్చింది. ఇద్దరితో మొదలైన ఈ సంస్థలో ఇప్పుడు 200 మంది వలంటీర్లు ఉన్నారు. వీళ్లలో ఎక్కువ మంది పదిహేడు నుంచి పద్దెనిమిది యేళ్ల లోపు వాళ్లే. ‘‘ఇది ఒక యాంబీషియస్ ప్రాజెక్ట్. ఎకోబ్రిక్ షెల్టర్హోమ్ గురించి వివరించే వీడియోలు యూట్యూబ్లో కూడా లేవు. దాంతో, మేమే ఒక డిజైన్ అనుకున్నాం. ఈ షెల్టర్ హోమ్స్ని వీధి కుక్కలు ఎక్కువగా ఉండే చోట పెడతాం” అని చెబుతోంది ‘ఉర్వరి’ కో–ఫౌండర్ వసుంధర గుప్తే.
పదేళ్ల కిందట ఆస్ట్రేలియాకు చెందిన రెబెక్కా ప్రిన్స్ రుయిజ్ ‘ప్లాస్టిక్ ఫ్రీ జూలై’ క్యాంపెయిన్ మొదలుపెట్టింది. ఒకసారి మాత్రమే వాడిపడేసే ప్లాస్టిక్కి నో చెప్పడం, ఎకోఫ్రెండ్లీ జీవనశైలిని పాటించడం ఈ క్యాంపెయిన్ థీమ్. ప్రపంచవ్యాప్తంగా చాలామంది యంగ్స్టర్స్ ఆమెని ఇన్స్పిరేషన్గా తీసుకున్నారు. ప్లాస్టిక్ వేస్ట్కి కొత్త అర్థం చెబుతూ పర్యావరణాన్ని కాపాడుతున్నారు.