ఉదయం రాజులా.. మధ్యాహ్నం మంత్రిలా.. రాత్రి బంటులా తినాలంటారు పెద్దలు. కానీ, చాలామంది ఇంటి పనులు, ఆఫీసులకెళ్లే హడావిడిలో బ్రేక్ఫాస్ట్ అరకొరగానే తింటున్నారు. దీనివల్ల వచ్చే కాంప్లికేషన్స్ ఏంటి? అలాగే బ్రేక్ ఫాస్ట్లో చేయకూడని మిస్టేక్స్ గురించి చెప్తున్నారు న్యూట్రిషనిస్ట్ సహీబా భరద్వాజ్.
డైట్ పేరుతో కొందరు.. రాత్రి ఎక్కువ తిన్నామని.. పొద్దు పొద్దున్నే కేలరీలు ఒంటికి పడవని మరికొందరు బ్రేక్ ఫాస్ట్ మానేయడమో లేదా తక్కువ తినడమో చేస్తుంటారు. ఇలా చేయడం వల్ల మెటబాలిజం దెబ్బతింటుంది. బ్లడ్లో కొలెస్ట్రాల్ పెరుగుతుంది. గుండె సమస్యలు, టైప్–2 డయాబెటిస్ వచ్చే అవకాశాలు కూడా చాలా ఎక్కువ. అందుకే బ్రేక్ ఫాస్ట్ బ్యాలెన్స్డ్గా ఉండాలి.
కొందరు బ్రేక్ ఫాస్ట్లో ఫ్రూట్స్ మాత్రమే తింటుంటారు. పాన్కేక్స్, ఉడకబెట్టిన గుడ్లు, ఆమ్లెట్, రోల్స్ లాంటి ఫుడ్ని కూడా ఎక్కువగా తింటుంటారు. ఇవి శరీరానికి సరిపడా శక్తిని ఇవ్వలేవు. దాంతో తిన్న అరగంట లేదా గంటకే ఆకలేస్తుంది. మళ్లీ ఏదైనా తినేవరకు మైండ్ ఫోకస్ సరిగా ఉండదు. అది శరీర ఆరోగ్యాన్ని కూడా దెబ్బతీస్తుంది. పైగా ఆకలిని కంట్రోల్ చేయడానికి ఫాస్ట్ఫుడ్, శ్నాక్స్ తింటే బరువు పెరిగే అవకాశం ఉంటుంది. కండరాలు ఆరోగ్యంగా ఉండాలంటే బ్రేక్ఫాస్ట్లో సరిపడా పోషకాలు ఉండాలి. అందుకే బ్రేక్ఫాస్ట్లో ప్రొటీన్స్, ఫ్యాట్స్ క్వాంటిటీ పెంచాలి. గుడ్లతో పాటు స్మోక్డ్ సాల్మన్, నట్ బటర్, పెరుగు, పనీర్ లాంటివి బ్రేక్ ఫాస్ట్లో తింటే మరీ మంచిది.
చాలామంది బ్రేక్ఫాస్ట్లో కార్బోహైడ్రేట్స్కి చోటు ఇవ్వరు. కానీ, వాటిని పూర్తిగా పక్కనపెట్టడం మంచిది కాదు. ఓట్స్, ఉప్మా, పోహ, శాండ్విచ్ లాంటివి తింటే రోజంతా ఎనర్జిటిక్గా ఉండొచ్చు. ఇవి రక్తంలోని గ్లూకోజ్ లెవల్స్ని పెంచవు కూడా. అన్శాచ్యురేటెడ్, ఒమెగా–3 ఫ్యాటీ యాసిడ్స్ని కూడా బ్రేక్ఫాస్ట్లో భాగం చేసుకోవాలి. అవిసె గింజలు , డ్రై ఫ్రూట్స్ కూడా బ్రేక్ఫాస్ట్లో తినాలి. బ్రేక్ఫాస్ట్ కాఫీలు, టీలు కూడా ఒక భాగమే. అయితే మూడ్ని, మెటబాలిజంని యాక్టివ్ చేయడానికి ఒక కప్పు టీ లేదా కాఫీ ఒకే. కానీ, అంతకు మించితే స్లీప్ డ్రిపివేషన్కి దారితీసే అవకాశం ఉంది. ఉదయాన్నే చాక్లెట్ పాన్కేక్స్, మఫిన్స్ , మయో శాండ్విజ్లు తినడం వల్ల రక్తంలో షుగర్ లెవల్స్ పెరిగి లేనిపోని అనారోగ్య సమస్యలొస్తాయి. అందుకే వాటికి దూరంగా ఉండాలి. అలాగే పొద్దుపొద్దున్నే ఫ్రూట్ జ్యూస్లకి బదులు ప్రూట్స్ తినడమే బెటర్. ముఖ్యంగా సిట్రస్ జ్యూస్లు తాగితే గ్యాస్ట్రిక్ ప్రాబ్లమ్స్ వచ్చే అవకాశాలు ఉంటాయి. అందుకే వాటిని పూర్తిగా పక్కనపెట్టాలి. నిద్రలేచాక గంటలోపు బ్రేక్ఫాస్ట్ తినకపోతే అనారోగ్యాన్ని కొని తెచ్చుకున్నట్టే . అలాగే బ్రేక్ఫాస్ట్లో డీప్ ఫ్రైలని అవాయిడ్ చేస్తే మంచిది.
