- జడ్చర్ల బీఆర్ఎస్ అభ్యర్థి సి.లక్ష్మారెడ్డి
బాలానగర్, వెలుగు : 'గత ప్రభుత్వాలు 70 ఏండ్లు పాలించాయి. ఎన్నడైనా తాగునీరు అందించాయా? రైతుల గోసను ఎన్నడైనా పట్టించుకున్నాయా? కాంగ్రెస్ అధికారంలోకి వస్తే మళ్లీ చీకట్లు వస్తాయి' అని జడ్చర్ల బీఆర్ఎస్ అభ్యర్థి, ఎమ్మెల్యే సి.లక్ష్మారెడ్డి అన్నారు. రాజాపూర్ మండలంలోని రంగారెడ్డిగూడ, గుండ్లపొట్లపల్లి, బీబీనగర్, నాన్ చెరువుతండా గ్రామాల్లో గురువారం ఆయన ఎన్నికల ప్రచారం నిర్వహించారు. ఈ సందర్భంగా ఆయన మాట్లాడుతూ సీఎం కేసీఆర్ హ్యాట్రిక్ సాధించడం ఖాయమన్నారు. రాష్ట్రంలో ప్రతి ఒక్కరికీ సంక్షేమ పథకాలు అందాయన్నారు.
దేశంలో ఎక్కడా లేని విధంగా రైతులకు పెట్టుబడి సాయం అందిస్తున్న ఏకైక రాష్ట్రం తెలంగాణ అని పేర్కొన్నారు. అభివృద్ధిలో దేశానికి తెలంగాణ ఆదర్శంగా నిలిచిందన్నారు. బీఆర్ఎస్ తొమ్మిదేళ్ల పాలనలో అమలు చేసిన సంక్షేమ పథకాలు మీ కళ్ల ముందరే ఉన్నాయన్నారు. ప్రజలు ఆలోచించి నిర్ణయం తీసుకోవాలని ఓటర్లను కోరారు. తనను మరోసారి గెలిపించాలని కోరారు.
