న్యూఢిల్లీ: ఉప రాష్ట్రపతి ఎన్నిక శనివారం ఉదయం 10 గంటల నుంచి సాయంత్రం 5 గంటల వరకు పార్లమెంట్లో జరగనుంది. సీక్రెట్ బ్యాలెట్ విధానంలో పోలింగ్ ఉంటుంది. పోలింగ్ పూర్తయిన వెంటనే ఓట్లు లెక్కించి, గెలిచిన అభ్యర్థి పేరు ప్రకటిస్తారు. ఈ ఎన్నికలో ఓటు వేసేందుకు లోక్ సభ, రాజ్యసభ ఎంపీలందరూ అర్హులే. మొత్తం 788 మంది ఓటు వేయనున్నారు. ఒక్కో ఎంపీ ఓటు విలువ ఒక్కటని ఎలక్షన్ కమిషన్(ఈసీ) తెలిపింది. పోలింగ్కు సంబంధించి తమ ఎంపీలకు విప్ జారీ చేసే అధికారం పార్టీలకు లేదని చెప్పింది. ఈ ఎన్నికలో ఎన్డీయే అభ్యర్థిగా బెంగాల్ మాజీ గవర్నర్జగదీప్ ధన్ కర్.. ప్రతిపక్షాల ఉమ్మడి అభ్యర్థిగా రాజస్థాన్ మాజీ గవర్నర్ మార్గరెట్ అల్వా పోటీ చేస్తున్నారు. జేడీయూ, వైఎస్సార్సీపీ, బీఎస్పీ, అన్నాడీఎంకే సహా పలు ప్రాంతీయ పార్టీలు కూడా మద్దతు ప్రకటించడంతో ధన్కర్ సుమారు 515 పైచిలుకు ఓట్లు సాధించనున్నారు. దీంతో ఆయన గెలుపు ఖాయమేనని రాజకీయ విశ్లేషకులు చెప్తున్నారు. మరోవైపు, ఆప్, జేఎంఎం, ఎంఐఎం, టీఆర్ఎస్ తదితర ప్రాంతీయ పార్టీలు మద్దతు పలికిన మార్గరెట్ అల్వా ఈ ఎన్నికలో 200 పైచిలుకు ఓట్లు సాధించే అవకాశం ఉంది. ఉపరాష్ట్రపతి అభ్యర్థి ఎంపికలో ప్రతిపక్ష కూటమి తనను సంప్రదించకపోవడంతో ఎన్నికల ఓటింగ్కు దూరంగా ఉండనున్నట్లు టీఎంసీ చీఫ్ మమతా బెనర్జీ ఇప్పటికే ప్రకటించారు.
