కామారెడ్డి, వెలుగు: ఎల్లారెడ్డి మాజీ ఎమ్మెల్యే ఏనుగు రవీందర్రెడ్డి కొద్దిరోజులుగా బీజేపీ ప్రోగ్రామ్లకు దూరంగా ఉంటున్నారు. ఆయన పార్టీ మారబోతున్నారంటూ జిల్లాలో జోరుగా ప్రచారం సాగుతుంది. ఆయన అనుచరులు కాంగ్రెస్లో చేరాలని ఒత్తిడి తీసుకొస్తున్నట్లు సమాచారం. రాష్ట్రంలో, నియోజకవర్గంలో ఉన్న ప్రస్తుత రాజకీయ పరిస్థితుల దృష్ట్యా పార్టీ మారాలని అనుచరులు ఒత్తిడి పెంచుతున్నట్లు తెలుస్తోంది. దీంతో ఏనుగు ఏ నిర్ణయం తీసుకోనున్నారనే దానిపై రాజకీయవర్గాల్లో ఆసక్తకర చర్చ నడుస్తోంది.
బీఆర్ఎస్ నుంచి ప్రస్థానం..
ఏనుగు రవీందర్రెడ్డి బీఆర్ఎస్ ఆవిర్భావం నుంచి ఆ పార్టీలో కొనసాగారు. ఉమ్మడి నిజామాబాద్ జిల్లాలో పార్టీలో కీలకంగా వ్యవహరించారు. పార్టీలో సీనియర్ ఎమ్మెల్యేగా, కేసీఆర్కు అత్యంత సన్నిహితుడిగా మెలిగారు. 2004లో మొదటిసారి ఎమ్మెల్యేగా గెలిచారు. ఉద్యమ సమయంలో రెండు సార్లు తన ఎమ్మెల్యే పదవికి రాజీనామా చేశారు. ఉమ్మడి నిజామాబాద్ జిల్లాలో టీడీపీ, కాంగ్రెస్ పార్టీలనుంచి పలువురు ముఖ్యనేతలను అప్పటి టీఆర్ఎస్ లోకి తీసుకొచ్చేందుకు కృషిచేశారు. 2018 అసెంబ్లీ ఎన్నికల్లో ఏనుగు రవీందర్రెడ్డి ఓడిపోయారు. కాంగ్రెస్ నుంచి పోటీ చేసిన జాజాల సురేందర్ గెలిచారు. అసెంబ్లీ ఎన్నికలు ముగిసిన 6 నెలల తర్వాత జాజాల బీఆర్ఎస్లో చేరారు.
నియోజకవర్గంలో ఎమ్మెల్యే, మాజీ ఎమ్మెల్యే గ్రూపులు ఏర్పడ్డాయి. పార్టీ వ్యవహారాల్లో కాంగ్రెస్ నుంచి చేరిన సిట్టింగ్ఎ మ్మెల్యేకు ప్రయార్టీ ఇవ్వడం ఏనుగు రవీందర్రెడ్డికి ఇబ్బందిగా మారింది. కొద్ది రోజులకే ఈటెల రాజేందర్ను మంత్రి పదవి నుంచి భర్తరఫ్ చేసి, పార్టీ నుంచి బయటకు పంపారు. ఈటెల రాజేందర్తో ఏనుగు రవీందర్రెడ్డికి పార్టీ ఆవిర్భావం నుంచి సన్నిహిత సంబంధాలు ఉన్నాయి. ఈ పరిస్థితుల్లో ఏనుగు రవీందర్రెడ్డి, ఈటెల రాజేందర్ వెంట నడిచారు. ఆయనతో పాటే 2021లో బీజేపీలో చేరారు. ఈటెలతో కలిసి రాష్ట్రవ్యాప్తంగా జరిగిన పార్టీ ప్రోగ్రామ్స్లో చురుగ్గా పాల్గొన్నారు. హుజూరాబాద్, మునుగోడు ఉప ఎన్నికల టైమ్లో ఈటెలతో కలిసి పార్టీ అప్పగించిన బాధ్యతల్లో పాలుపంచుకున్నారు.
మార్పుపై సమాలోచనలు..
కర్నాటక రాష్ట్ర ఎన్నికల ఫలితాల తర్వాత రాష్ట్ర రాజకీయాల్లో మార్పులు ఏర్పడ్డాయి. దీంతో ఏనుగు రవీందర్రెడ్డి అనుచరులు పార్టీ మారాలని ఒత్తిడి తెస్తున్నారు. ఈటెల రాజేందర్కు తాజాగా బీజేపీ హైకమాండ్పదవి ప్రకటించినా, ఏనుగు రవీందర్రెడ్డి మాత్రం ఆయనకు దూరంగానే ఉంటున్నారు. తన నియోజకవర్గంలో రాజకీయ పరిస్థితులు, అనుచరుల ఒత్తిడి మేరకు పార్టీ మార్పుపై ఏనుగు రవీందర్రెడ్డి సమాలోచనలు చేస్తున్నట్లు తెలుస్తోంది.
అనుచరులతో చర్చించిన తర్వాతే..
పార్టీ మార్పుపై త్వరగా నిర్ణయం తీసుకోవాలని అనుచరులు ఆయనపై ఒత్తిడి తీసుకొస్తున్నారు. ఆయన ఇంకా ఏ నిర్ణయం తీసుకోలేదు. వారంరోజులుగా ఆయన రాజస్థాన్లో ఉన్నారు. మరో 2 రోజుల్లో ఇక్కడకి రానున్నారు. తర్వాత తన అనుచరులతో చర్చించి, వారి సూచనలకు అనుగుణంగా బీజేపీలో కొనసాగడమా? లేక మరో పార్టీలో చేరడమా? అనే విషయంపై నిర్ణయం తీసుకోనున్నారు.
