సంధ్య, రాము.. ఇద్దరికీ ఒకరంటే ఒకరికి చాలా ఇష్టం. పెద్దల్ని ఒప్పించి పెండ్లి కూడా చేసుకున్నారు. మొదట్లో అన్యోన్యంగా ఉన్న ఆ జంట మధ్య .. కొన్నాండ్లకి అపార్థాలు మొదలయ్యాయి. సంధ్య ఏదైనా విషయంలో కోప్పడితే.. రాము చెయ్యి చేసుకునేవాడు. ఆమె ఏడిస్తే కసిరేవాడు. రాము ఏ చిన్న పొరపాటు చేసినా సంధ్య కూడా గట్టిగట్టిగా అరిచేది, తిట్టేది. ఇంట్లో సామాన్లు విసిరేసేది. మ్యారేజ్ కౌన్సెలర్ని కలిస్తే.. వాళ్లు మారిటల్ హేట్రెడ్తో బాధపడుతున్నారని తెలిసింది. ఎమోషనల్ ఇంటెలిజెన్స్ లేకపోవడం వల్ల ఇదంతా జరుగుతుందన్నారు కౌన్సెలర్లు. అసలు మారిటల్ హేట్రెడ్,
ఎమోషనల్ ఇంటెలిజెన్స్ అంటే ఏంటి? ఇవి రిలేషన్ని ఎలా ఎఫెక్ట్ చేస్తాయి?
భార్యాభర్తల మధ్య గొడవలు చాలా సందర్భాల్లో బంధాన్ని మరింత బలపరుస్తాయి. కానీ, ఎప్పుడైతే ఆ గొడవలు వాళ్లని పర్సనల్గా ఎఫెక్ట్ చేస్తాయో.. భార్యాభర్తలు ఒకరిలోని లోపాల్ని మరొకరు సహించలేకపోతారో అదే మారిటల్ హేట్రెడ్. ఇంకాస్త వివరంగా చెప్పాలంటే ఏ రిలేషన్లో అయితే మితిమీరిన నెగెటివిటీ, ఫ్రస్ర్టేషన్ ఉంటుందో దాన్నే మారిటల్ హేట్రెడ్ అంటారు సైకాలజిస్ట్లు. దీనికి కారణం పార్ట్నర్స్లో ఎమోషనల్ ఇంటెలిజెన్స్ లేకపోవడమే..
ఎమోషనల్ ఇంటెలిజెన్స్ అంటే ...
ఐ.క్యు.( ఇంటెలిజెంట్ కోషెంట్) గురించి అందరికీ తెలిసిందే. ఒక వ్యక్తి తెలివితేటల్ని లెక్క కట్టి చెప్తుంది ఇది. అచ్చు ఇలాగే.. ఎదుటివాళ్ల ఎమోషన్స్ని ఫీల్ అవ్వడం, అర్థం చేసుకోవడం, వాటికి తగ్గట్టు నడుచుకునే సామర్థ్యాన్ని ఎమోషనల్ ఇంటెలిజెన్స్(ఈ.క్యూ.) అంటారు. అలాగే ఎవరికి వాళ్లు వాళ్ల ఫీలింగ్స్, ఎమోషన్స్ని అర్థం చేసుకోవడం..హెల్దీ పద్ధతిలో వాటిని పార్ట్నర్కి చెప్పడం కూడా ఎమోషనల్ ఇంటెలిజెన్స్ కిందే వస్తుంది.
ఈ.క్యూ. లేకపోతే..
హెల్దీ రిలేషన్కి బ్రిడ్జ్ లాంటిది ఎమోషనల్ ఇంటెలిజెన్స్ . పార్ట్నర్స్కి అది లేకపోతే ఒకరి ఎమోషన్స్ గురించి మరొకరు ఆలోచించరు. ఇద్దరి మధ్యా గొడవ జరిగితే.. ఎదుటివాళ్లు బాధపడతారేమోనన్న ఆలోచన లేకుండా నిందించుకుంటారు. ఇంతకుముందు చేసిన తప్పుల్ని తవ్వి తీస్తుంటారు. లోపాల్ని ఎత్తి చూపించుకుంటారు. అలా ఇద్దరూ ఒకరినొకరు అర్థం చేసుకోవడంలో ఫెయిల్ అవడం వల్ల.. రిలేషన్లో నెగెటివిటీ పెరుగుతుంది. అది మారిటల్ హేట్రెడ్కి దారితీస్తుంది.
ఒకరికుంటే సరిపోదు
ఎమోషనల్ ఇంటెలిజెన్స్ పార్ట్నర్స్లో ఒకరికున్నా బంధం నిలబడుతుందా? అంటే లేదు. భార్య లేదా భర్తలో ఒకరు మాత్రమే ఎమోషనల్గా ఇంటెలిజెంట్ అయితే.. ప్రతి సిచ్యుయేషనల్ వాళ్లే పార్ట్నర్ని అర్థం చేసుకోవాల్సి వస్తుంది. వాళ్లే ప్రతిసారీ కాంప్రమైజ్ అవుతారు. దాంతో రిలేషన్ని నిలబెట్టుకునే బాధ్యతంతా వాళ్లపైనే పడుతుంది. అలా ఎక్కువ రోజులు వాళ్ల ఎమోషన్స్ని దాచుకుంటూ..పార్ట్నర్ని కంఫర్ట్ జోన్లో ఉంచడం వల్ల.. రానురాను సమస్య మరింత తీవ్రం అవుతుంది. అది బంధాన్ని మరింత బలహీనం చేస్తుంది. అందుకే భార్యాభర్తలిద్దరూ ఈ.క్యూ.ని అలవాటు చేసుకోవాలి. పరిస్థితులు ఎంత కఠినంగా ఉన్నా ఎదుటి వాళ్ల ఎమోషన్స్, ఫీలింగ్స్ అర్థం చేసుకోవాలి. అప్పుడే ఎన్ని సమస్యలొచ్చినా బంధం బలంగా ఉంటుంది. ఒక్క భార్యభర్తలే కాదు ఫ్రెండ్స్, ఫ్యామిలీ.. ఇలా ఏ రిలేషన్లోనైనా ఎమోషనల్ ఇంటెలిజెంట్ ఫార్ములా ఫాలో అవ్వాల్సిందే.
సమస్యని చూడటంలో మార్పు
భార్యాభర్తలకి ఎమోషనల్ ఇంటెలిజెన్స్ ఉంటే.. సందర్భం ఏదైనా ఎదుటి వాళ్ల దృష్టి నుంచి కూడా సమస్యని చూస్తారు. ఊదాహరణకి పార్ట్నర్ గొడవపడుతుం టే.. దానికి దారితీసిన కారణాలు, వాళ్లని ఎమోషనల్గా అంత బాధ పెట్టిన విషయం ఏంటని ఆలోచిస్తారు. ఏదైనా అబద్ధం చెప్తే.. నిజం చెప్పకపోవడం వెనకున్న కారణాన్ని అర్థం చేసుకుంటారు. పార్ట్నర్ చిరాకు పడ్డా, ఫ్రస్ట్రేషన్లో ఉన్నా.. ఓవరాల్గా వాళ్లు ఎందుకలా ప్రవర్తిస్తు న్నారన్న విషయాన్నే చూస్తారు. వాళ్ల ఎమోషన్స్ని ఫీలై.. దానికి తగ్గట్టుగా మాట్లాడతారు. వాళ్ల ఫీలింగ్స్కి రెస్పెక్ట్ ఇస్తారు. వాళ్లని కంఫర్ట్గా ఉంచుతారు. దానివల్ల ఇద్దరి మధ్యా ఎంత పెద్ద గొడవ జరిగినా.. దానంతట అదే సద్దుమణుగుతుంది.
