కందనూలు, వెలుగు: బిజినేపల్లి మండలం వట్టెం శివారులో కోళ్ల షెడ్డులో డీఆర్ఐ ఆఫీసర్లు బుధవారం రాత్రి డ్రగ్స్ పట్టుకోగా, ఎక్సైజ్ ఆఫీసర్లు గురువారం తయారీ కేంద్రాన్ని పరిశీలించారు. స్థానిక కల్లు వ్యాపారులు వట్టెం పరిసరాల్లోని పంట పొలాల్లో కల్తీ కల్లు తయారు చేస్తున్నారు. ఆల్ఫ్రాజోలం, డైజోఫామ్ వంటి మత్తు పదార్థాలను తీసుకువచ్చి గుట్టుగా భద్రపరిచి దందా సాగిస్తున్నారు. పక్కా సమాచారంతో డీఆర్ఐ ఆఫీసర్లు దాడులు చేశారు. 31 కేజీల ఆల్ఫాజోలం సీజ్ చేశారు.
ఒక కారును స్వాధీనం చేసుకున్నారు. ఈ దందాలో ఎవరున్నారనే విషయంపై ఆరా తీస్తున్నారు. ఈ దందాకు ఎక్సైజ్ ఆఫీసర్లు సహకరిస్తున్నట్లు సమాచారం ఉండడంతో ఆ దిశగా విచారణ చేపట్టారు. డీఆర్ఐ దాడులపై తమకు ఎలాంటి సమాచారం లేదని ఎక్సైజ్ ఎస్ఐ జగన్మోహన్ రెడ్డి తెలిపారు.
