- చల్లగా ఉంటదని పడుకున్నానన్న మందుబాబు
- నివ్వెరపోయిన పోలీసులు, 108 సిబ్బంది
- సోషల్ మీడియాలో వీడియో వైరల్
- గ్రేటర్‍ వరంగల్‍లో ఘటన
వరంగల్‍, వెలుగు : పీకల వరకు మందుకొట్టిన ఓ ప్రబుద్ధుడు ఏకంగా ఐదు గంటలు చెరువులో పడుకోగా ..ఇది చూసిన స్థానికులు శవం అనుకుని పోలీసులకు సమాచారం ఇచ్చారు. వారు వచ్చి అతడిని లేపుతుండగా ఒక్కసారిగా పైకి లేచి షాక్ ఇచ్చాడు. స్థానికుల కథనం ప్రకారం.. హనుమకొండ రెడ్డికాలనీ యాదవనగర్‍ నుంచి వంగపహాడ్‍ ఔటర్‍ రింగురోడ్‍ చేరుకునే రూట్లో రెడ్డిపురం కోవెలకుంట చెరువు ఉంది. సోమవారం ఉదయం అటుగా వెళ్తున్న కొందరు ఒంటిపై షర్ట్లేకుండా నీళ్లపై తేలియాడుతున్న ఓ వ్యక్తిని చూశారు. చనిపోయాడేమో అనుకుని పోలీసులకు సమాచారమిచ్చారు.
దీంతో పోలీసులు,108 సిబ్బంది అక్కడకు చేరుకున్నారు. ‘ఆత్మహత్య చేసుకున్నాడా లేక ఎవనైనా చంపిపడేశారా’ అనే అనుమానంతో పరిశీలించి చూస్తున్నారు. దీన్ని అక్కడున్న వాళ్లు తమ ఫోన్లలో వీడియో తీస్తున్నారు. అంతలో ఓ కానిస్టేబుల్‍ నీళ్లలో ఉన్న వ్యక్తి చెయ్యిపట్టి మెల్లిగా బయటకు లాగే ప్రయత్నం చేయగా అతడు ఒక్కసారిగా లేచి కూర్చున్నాడు. దీంతో అక్కడున్న వారు ఆశ్చర్యపోయారు. ఏమీ కానందుకు సంతోషించి కుంటలో ఎందుకు పడుకున్నావని అడిగారు. దీనికి సదరు మందుబాబు ‘ మందు తాగాక సల్లదనం కోసం పన్నా’ అని చెప్పాడు.
‘ఐదు గంటలుగా నీళ్లలో ఇట్లనే పడి ఉన్నావ్ మునిగిపోతే ఎట్లా’ అని అడిగితే ‘ బండ పట్టుకొని పన్నా సార్ ఏం కాదు’ అని రిప్లై ఇచ్చాడు. ‘సార్ రూ.50 ఇస్తే నేను పనిచేసే కాజీపేటకు వెళ్లిపోతా’ అని వారిని బతిమిలాడుకున్నాడు. సదరు మందుబాబును నెల్లూరు జిల్లా కావలికి చెందిన వ్యక్తిగా గుర్తించారు.
