న్యూఢిల్లీ: ప్రస్తుత పరిస్థితుల్లో ఎవరికైనా జ్వరం వచ్చినా కరోనా అని భయపడుతున్నారు. ఈ నేపథ్యంలో కరోనా పేషెంట్స్‌లో జ్వరం లక్షణాలు తక్కువే అని ఇండియన్ కౌన్సిల్ ఆఫ్ మెడికల్ రీసెర్చ్ (ఐసీఎంఆర్) పబ్లిష్ చేసిన జర్నల్ ద్వారా తెలిసింది. ఇప్పుడున్న పరిస్థితుల్లో కరోనా రోగుల్లో జ్వరం లక్షణాలు కేవలం 17% మాత్రమే ఉన్నాయని సదరు జర్నల్ పేర్కొంది. హరియాణాలోని జజ్జార్ ఆల్ ఇండియా ఇన్‌స్టిట్యూట్ ఆఫ్ మెడికల్ సైన్సెస్ (ఎయిమ్స్‌) తరౌమా సెంటర్‌‌లో జ్వరంతో బాధపడుతున్న 144 మందిని ఐసీఎంఆర్ పరిశీలించింది. వీరిలో 17 శాతం మందికి మాత్రమే కరోనా లక్షణాలు ఉన్నాయని గుర్తించామని ఐసీఎంఆర్ పేర్కొంది.
‘కేవలం 17% మందిలో మాత్రమే జ్వరం లక్షణాలు ఉన్నాయి. ప్రపంచవ్యాప్తంగా వెలువడిన రిపోర్ట్స్‌తో పోల్చుకుంటే ఇది చాలా తక్కువ. చైనీస్ కోహోర్ట్‌ రిపోర్ట్‌లో 44 శాతం మందికి జ్వరం సింప్టమ్స్‌ ఉన్నాయని బయటపడింది’ అని ఆ స్టడీ స్పష్టం చేసింది. కరోనా లక్షణాల్లో జ్వరం, దగ్గు, గొంతు నొప్పి, శ్వాస పీల్చుకోవడంలో ఇబ్బంది, అలసట అని మొదట్లో గుర్తించారు. ఆ తర్వాత ఈ లిస్ట్‌లో వాసన, రుచిని పసి గట్టలేకపోవడం, డయేరియా, కండరాల నొప్పిని కూడా చేర్చారు.
