టెక్నాలజీ ఎప్పటికప్పుడు అప్డేట్ అవుతూ, మనల్ని అప్డేట్ చేస్తూ ఉంటుంది. ఇప్పుడు కొత్తగా అప్డేట్ చేసేందుకు కొన్ని ఫీచర్స్ వచ్చేశాయి. వాటిలో అందరికీ అవసరమైన ఫీచర్ చాట్ లాక్. వాట్సాప్లో చాట్ లాక్ చేసుకునేందుకు ఇది ఉపయోగపడుతుంది. అలాగే మ్యూజిక్ లవర్స్ కోసం పాటలతో నాన్ స్టాప్ ఎంటర్టైన్మెంట్, టాపిక్ ఫిల్టర్స్ సాయంతో గూగుల్లో ఈజీగా సెర్చ్ చేసుకోవచ్చు.
పర్సనల్ చాట్కు లాక్
వాట్సాప్ ఎప్పటికప్పుడు కొత్త ఫీచర్స్ని తెస్తుంటుంది. అలాగే ఈసారి ఓ సరికొత్త ఫీచర్ తీసుకురాబోతోంది. ఈ రోజుల్లో ఒక వ్యక్తి గురించి తెలుసుకోవాలంటే వాళ్ల ఫోన్ చూస్తే సరిపోతుంది అంటారు. అందులోనూ కొందరికి ఇతరుల పర్సనల్ చాట్స్ చూడాలనే ఆసక్తి ఎక్కువ ఉంటుంది. కానీ, దానివల్ల ఆ ఫోన్ వాడేవాళ్ల ప్రైవసీకి ఇబ్బంది. దాంతో చాలాసార్లు ఇతరులకు ఫోన్ ఇవ్వాలంటే ఆలోచించాల్సి వస్తుంది. అయితే, ఇప్పుడు వాట్సాప్ తీసుకొచ్చిన ఈ ఫీచర్ వల్ల ఆ సమస్యకు చెక్ పెట్టినట్టే. అదేంటంటే... ఫోన్కి లాక్ వేసినట్టే వాట్సాప్లో చాట్ చేసే నెంబర్లకు కూడా లాక్ వేసుకోవచ్చు. ఆ లాక్ ఓపెన్ అయితేనే ఆ నెంబర్తో చేసిన చాట్ చదవగలరు. ఒకవేళ వేరేవాళ్లు మీ చాట్ లాక్ ఓపెన్ చేయడానికి ట్రై చేస్తే మూడు సార్లు మాత్రమే ఛాన్స్ ఉంటుంది. ఆ మూడు సార్లు పాస్వర్డ్ రాంగ్గా ఎంటర్ చేస్తే ఆటోమేటిక్గా చాట్ మొత్తం క్లియర్ అయిపోతుంది. దాంతో చాట్ని చూసే అవకాశం పోతుంది. అలాగే లాక్డ్ చాట్లో ఉన్న ఫొటోలు, వీడియో ఫైల్స్ కూడా ఆటోమేటిక్ డివైజ్ గ్యాలరీలో సేవ్ కావు. ఈ ఫీచర్ని ప్రస్తుతం డెవలప్ చేస్తోంది వాట్సాప్ టీం.
మ్యూజిక్ అన్స్టాపబుల్
మ్యూజిక్ లవర్స్ కోసమే మ్యూజిక్ స్ట్రీమింగ్ సర్వీస్లు బోలెడు వచ్చాయి. అయితే, ఈ యాప్స్ ఎక్కువగా ఉండడం వల్ల ఏది వాడాలో తెలియక కన్ఫ్యూజన్ కూడా వస్తుంది. కొన్నిసార్లు ఒక యాప్ తీసేసి, మరొకటి వేసుకున్నప్పుడు ఇంతకుముందు ప్లే లిస్ట్లో ఉన్న పాటలన్నీ కొత్తదాంట్లోకి ట్రాన్స్ఫర్ చేయాల్సి వస్తుంది. కానీ, అది కాస్త పెద్ద పనే. ఆ పనిని సింపుల్గా చేసుకునేందుకు నిఫ్టీ టూల్ సౌండీజ్ హెల్ప్ చేస్తుంది. ఇది మ్యూజిక్ స్ట్రీమింగ్ యాప్ల మధ్య మొత్తం ప్లే లిస్ట్లను ట్రాన్స్ ఫర్ చేస్తుంది. వాటిని సింక్లో కూడా ఉంచుతుంది. దీన్ని వాడాలంటే ఫోన్లో సౌండీజ్.కామ్(soundiiz.com)ని ఓపెన్ చేయాలి. అందులో పైన కుడివైపున ఉన్న బటన్ క్లిక్ చేసి లాగిన్ కావాలి. దాంతో డైరెక్ట్గా సౌండీజ్ యాప్కి వెళ్తారు. ఆ తర్వాత ఎడమవైపు పైన ఉన్న హాంబర్గర్ మెను గుర్తును క్లిక్ చేసి, కింద వైపు ఆన్లో ఉన్న కనెక్ట్ సర్వీసెస్ బటన్ ప్రెస్ చేయాలి. ఇక్కడ ప్లే లిస్ట్ లేదా సింక్ సర్వీస్ కోసం కనెక్ట్ బటన్ నొక్కాలి. అయితే ఒకేసారి ఒకటి కంటే ఎక్కువ ప్లే లిస్ట్లను ట్రాన్స్ఫర్ చేయలేం. మరి ఎలా సింక్ చేయాలి అంటే.. మెను ఓపెన్ చేసి, ఫస్ట్ ప్లే లిస్ట్ మీద నొక్కి కన్ఫర్మ్ చేయాలి. తర్వాత కంటిన్యూ బటన్ ప్రెస్ చేసి, రెండో ప్లే లిస్ట్ సెలక్ట్ చేయాలి. ఇందులో ట్రాక్స్ సెలక్ట్ చేసుకునే ఆప్షన్ కూడా ఉంటుంది. ప్రతిరోజు లేదా ప్రతి నెలా సింక్ చేసుకునేందుకు ఫ్రీక్వెన్స్ సెలక్ట్ చేసుకోవాలి. ఆ తర్వాత సేవ్ కాన్ఫిగరేషన్ మీద నొక్కాలి.
గూగుల్ కొత్త ఫీచర్
టాపిక్ ఫిల్టర్స్ అనే కొత్త ఫీచర్ తీసుకొచ్చింది గూగుల్. దాని ద్వారా యూజర్లు సెర్చ్ చేసిన పదం బట్టి ఆయా సబ్జెక్ట్స్ను గూగుల్ సెర్చ్ రిజల్ట్స్ పేజి(SERP)లో సూచిస్తుంది. ఉదాహరణకు.. Google Pixel 7 కోసం సెర్చ్ చేస్తే.. రిజల్ట్స్‌‌లో షాపింగ్, ఫొటోలు, న్యూస్ వంటి కామన్ సెర్చ్ ట్యాబ్‌‌లకు కుడి వైపున ‘Details‘, ‘Reviews‘ వంటివి కూడా చూపిస్తుంది. గూగుల్ సెర్చ్ డెస్క్‌‌టాప్ వెర్షన్‌‌కు ఈ కొత్త ఫీచర్‌‌ను అందుబాటులోకి తెచ్చింది. అయితే, ఇందులో టాపిక్స్ సెర్చ్ చేసే కొద్దీ రిజల్ట్స్ మారుతున్నాయి. అందువల్ల ఈ సర్వీస్ వాడే వాళ్లకు వాళ్లు వెతుకుతున్న సబ్జెక్ట్ను కచ్చితంగా ఇవ్వగలుగుతుంది. ఇందులోని ఫిల్టర్స్ను సెట్ చేసేందుకు యూజర్లకు అనుమతించే ‘All Filters’ అని, లేబుల్ కింద కొత్త డ్రాప్-డౌన్ మెనుని కూడా గూగుల్ తెచ్చింది. ఇప్పటివరకు సెర్చ్ ట్యాబ్‌‌లు ఎనిమిది కేటగిరీలుగా చూపించింది. అందులో ఫొటోలు, మ్యాప్‌‌లు, షాపింగ్, వార్తలు, వీడియోలు, విమానాలు, పుస్తకాలు, ఫైనాన్స్ అనేవి ఉంటాయి. ప్రస్తుతం అమెరికాలోని గూగుల్ యూజర్లకు మాత్రమే ఈ కొత్త ఫీచర్ అందుబాటులో ఉంది. త్వరలో ఇతర భాషలు, ప్రాంతాలకు విస్తరించాలి అనుకుంటోంది గూగుల్.
