హాలియా, వెలుగు: నల్గొండ జిల్లా నాగార్జునసాగర్‌‌లోని బుద్ధవనంలో శుక్రవారం విదేశీ పర్యాటకల సందడి నెలకొంది. అంతర్జాతీయ పర్యాటక కేంద్రం నాగార్జునసాగర్ సందర్శనలో భాగంగా స్విట్జర్లాండ్, ఆస్ట్రేలియా, ఫ్రాన్స్‌ పర్యాటకులతో పాటు థాయిలాండ్ దేశానికి చెందిన వాట్ థాయ్ బోధగయ బౌద్ధ విహారానికి చెందిన బౌద్ధ మత గురువులు బుద్ధ వనాన్ని సందర్శించారు. వివిధ దేశాలకు చెందిన బౌద్ధ విదేశీయుల బృందం సాగర్‌‌లోని తెలంగాణ టూరిజం విజయ విహార్ గెస్ట్ హౌస్ లో బస చేశారు.
సాగర్ సందర్శనలో భాగంగా బుద్ధవనాన్ని విదేశీయుల బృందం సందర్శించింది. దీనిలో భాగంగా మహా మహా స్తూపం అంతర్భాగంలోని ఆచార్య నాగార్జున విగ్రహం చుట్టూ పరిక్రమలు చేశారు. అనంతరం మహాస్తూపంలోని ధ్యాన మందిరంలో బుద్ధజ్యోతులను వెలిగించి ధ్యానం చేశారు. శనివారం ఈ బృందం నాగార్జునకొండ మ్యూజియాన్ని సందర్శించనుంది. కాగా వీరికి బుద్ధవనం అధికారులు శాసన, రవిచంద్రలు బుద్ధవనం విశేషాలను తెలియచేసి బ్రోచర్లను అందజేశారు.
