ఆదిలాబాద్ టౌన్, వెలుగు: ప్రజలు ఇచ్చిన తీర్పుకు కట్టుబడి ఉంటూ ప్రతిపక్ష నాయకుడిగా ప్రజలకు అండగా ఉంటానని ఆదిలాబాద్ మాజీ ఎమ్మెల్యే జోగు రామన్న అన్నారు. జిల్లా కేంద్రంలోని బీఆర్ఎస్ పార్టీ కార్యాలయంలో బుధవారం ఆయన విలేకర్ల సమావేశంలో మాట్లాడారు. తన రాజకీయ ప్రస్థానంలో వెన్నుదన్నుగా నిలిచిన ప్రతి కార్యకర్తకు అండగా ఉండి, వారి రుణం తీర్చుకుంటానన్నారు.
ఎమ్మెల్యేగా గెలిచిన పాయల్ శంకర్కు చిత్తశుద్ధి ఉంటే బీఆర్ఎస్ ప్రభుత్వం హయాంలో చేసినటువంటి అభివృద్ధి కార్యక్రమాలకే మళ్లీ కొబ్బరికాయలు కొట్టకుండా.. స్వతహాగా నిధులు తెప్పించుకొని కొత్త పనులు చేపట్టాలన్నారు. ప్రజా తీర్పుని పూర్తిగా గౌరవిస్తూ వారితోనే కలిసి నడుస్తామన్నారు. కార్యక్రమంలో మున్సిపల్ వైస్ చైర్మన్ జహీర్రంజాని, లీడర్లు అజయ్, బండారి సతీశ్, మెట్టు ప్రహల్లాద్, కౌన్సిలర్లు తదితరులు పాల్గొన్నారు.
