- మాజీ మంత్రి హరీశ్ రావు
సిద్దిపేట, వెలుగు: తెలంగాణ ప్రజలు మళ్లీ కేసీఆర్ రావాలని కోరుకుంటున్నారని మాజీ మంత్రి, ఎమ్మెల్యే హరీశ్ రావు అన్నారు. ఆదివారం సిద్దిపేట పట్టణంలోని 20 వ వార్డులో పార్టీ ఆఫీసును ప్రారంభించి మాట్లాడారు. ప్రజల గుండెల్లో నిలిచేది గులాబీ జెండానే అని, కేసీఆర్ నాయకత్వంలో అన్ని వర్గాలకు న్యాయం జరిగిందన్నారు. అభివృద్ధి, సంక్షేమంలో తెలంగాణ రాష్ట్రాన్ని అగ్రగామిగా నిలిపిన ఘనత కేసీఆర్దే అన్నారు. కాంగ్రెస్ ప్రభుత్వం లో అన్ని వర్గాలు అసంతృప్తితో ఉన్నాయన్నారు.
ప్రతి వార్డ్ లో పార్టీ ఆఫీసు ఏర్పాటుచేసి పార్టీ కార్యకర్తలకు, ప్రజలకు అందుబాటులో ఉంటామని తెలిపారు. ఈ సందర్భంగా బీఆర్ఎస్పార్టీ లో పలువురు యువకులు చేరగా వారికి హరీశ్ రావు కండువా కప్పి పార్టీ లోకి ఆహ్వానించారు. అంతకుముందు ఎమ్మెల్యే క్యాంపు ఆఫీసులో నిర్వహించిన కార్యక్రమంలో అమర్నాథ్ అన్నదాన సేవా సమితి సభ్యులను, రాష్ట్రస్థాయి అథ్లెటిక్స్ పోటీల్లో ప్రతిభ చూపిన క్రీడాకారులను సన్మానించారు.
