40 ఏళ్లుగా సేకరిస్తున్న ఫ్రాన్స్ మాజీ ఫైటర్ పైలట్
ఇన్ని యుద్ధ విమానాలున్న అతిపెద్ద ప్రైవేట్ సంస్థగా గిన్నిస్ గుర్తింపు
మిగ్ 21 నుంచి మిరాజ్ 2000 దాకా.. ఎఫ్ 16 నుంచి ఎఫ్ 104 స్టార్ఫైటర్ దాకా.. ఒకటా రెండా 110 యుద్ధ విమానాలు ఒక దాని పక్కన మరొకటి హాయిగా సేద తీరుతున్నాయి. అలాగని అదేం మిలటరీ బేస్ కాదు. ఎయిర్పోర్ట్ అంతకన్నా కాదు. ఇవన్నీ ఒకే ఒక్క వ్యక్తి దగ్గర ఉన్న ప్రముఖ దేశాల యుద్ధ విమానాలు. ఫ్రాన్స్కు చెందిన మిషెల్ పోంట్ అనే 87 ఏళ్ల వ్యక్తి ఈ పాత యుద్ధ విమానాలను తెచ్చి ఇంట్లో పెట్టుకుంటున్నారు. మిలటరీలో ఎన్నో ఏళ్లపాటు యుద్ధ విమానాలను నడిపిన ఆయన, వాటిపై ఇష్టాన్ని పెంచుకున్నారు.
ఆ ఇష్టంతోనే 1980లో ‘ద షాట్యూ డి సేవినీలిస్ బ్యూని’ పేరిట ఓ కెజిల్ను బర్గండీలో తెరిచారు. అప్పటి నుంచి పాత యుద్ధ విమానాలను ముక్కలు ముక్కలుగా చేసేయాలని భావించే దేశాలకు వెళ్లి, వాటిని సేకరించడం మొదలు పెట్టారు. అప్పటి నుంచి ఇప్పటిదాకా 110 పాత యుద్ధ విమానాలను తన కెజిల్లో భద్రంగా దాచారాయన. అంతేకాదు, 8 ఏళ్లుగా ఫ్రాన్స్ నిర్వహిస్తున్న చాంపియన్షిప్లో 168 ట్రోఫీలను కూడా గెలుచుకున్నారు. అవే కాదు, 200 ఆనాటి బైకులు, 36 రేసింగ్ కార్లూ ఆయన కాంపౌండ్లో ఉన్నాయి.
ఇక, ఉన్న విమానాల్లో ఎక్కువగా బెల్జియం, రష్యా, చెక్ రిపబ్లిక్, పోలండ్ల నుంచి వచ్చినవే. ఇవన్నీ చూసిన గిన్నిస్ బుక్కోళ్లు, ప్రపంచంలోనే ఎక్కువ యుద్ధ విమానాలను కలిగి ఉన్న అతి పెద్ద ప్రైవేట్ సంస్థగా రికార్డు ఇచ్చింది. అయితే, వివిధ దేశాల్లోని ఆ యుద్ధ విమానాలను తన దగ్గరకు తెచ్చుకోవడం చాలా పెద్ద పని కాబట్టి.. అక్కడికే మెకానిక్లను తీసుకెళ్లి, పార్టులుపార్టులుగా విడగొట్టి విమానంలో తెచ్చేసుకునేవారు. మళ్లీ తన కెజిల్లో వాటిని బిగించుకునేవారు. ఒకసారి డిజిబౌటిలోని ఎయిర్పోర్ట్ రన్వేపై తానే స్వయంగా ఓ విమానాన్ని విడగొట్టి తెచ్చుకున్నారు. ప్రస్తుతం 30 ఎకరాల్లో ఉన్న ఆ కెజిల్ను ఏటా 40 వేల మంది వచ్చి యుద్ధ విమానాలను చూసి వెళ్తుంటారు. ప్రారంభించిన మొదట్లో 50 నుంచి 100 మంది మాత్రమే వచ్చేవారంటారు మిషెల్!!
