గద్వాల, వెలుగు: గ్రామ పంచాయతీ ఎన్నికల్లో సర్పంచ్, వార్డు సభ్యుల పదవులను వేలం వేస్తే చట్ట ప్రకారం కఠిన చర్యలు తప్పవని కలెక్టర్ సంతోష్ హెచ్చరించారు. నామినేషన్ సమయంలో బెదిరింపులు, దౌర్జన్యం, లంచాలు, సర్పంచ్, వార్డు పదవులకు ఏకగ్రీవాలకు వేలం వంటి అనైతిక చర్యలకు పాల్పడితే చర్యలు తీసుకుంటామన్నారు.
ఎన్నికలు నిస్పక్షపాతంగా నిర్వహించేందుకు ప్రతి ఒక్కరూ సహకరించాలన్నారు. అనైతిక చర్యలకు పాల్పడిన వారు ఆరేండ్ల పాటు ఎన్నికల్లో పోటీ చేసేందుకు అనర్హులు అవుతారని తెలిపారు. పదవులను వేలం వేస్తే వెంటనే పోలీసులకు ఫిర్యాదు చేయాలన్నారు. రాష్ట్ర ఎన్నికల సంఘం ఆదేశాలను అమలు చేయాలని సంబంధిత అధికారులకు సూచించారు.
అభ్యర్థుల డిక్లరేషన్ తప్పనిసరి..
గ్రామపంచాయతీ ఎన్నికల్లో నామినేషన్ వేసిన అభ్యర్థుల నుంచి డిక్లరేషన్ తప్పనిసరిగా తీసుకోవాలని కలెక్టర్ సంతోష్ సూచించారు. శుక్రవారం గద్వాల మండలం శెట్టి ఆత్మకూర్, సంఘాల గోనుపాడు, మదనపల్లి, ఈడిగోనిపల్లి గ్రామపంచాయతీల్లో నామినేషన్ స్వీకరణ ప్రక్రియను పరిశీలించారు.
ఎన్నికల ఖర్చులకు సంబంధించిన లెక్కల నిర్వహణపై అభ్యర్థి దాఖలు చేయాల్సిన డిక్లరేషన్ ఫారంపై అవగాహన కల్పించాలన్నారు. విధుల్లో అలసత్వం వహిస్తే కఠిన చర్యలు తప్పవని హెచ్చరించారు. నామినేషన్ వేసిన అభ్యర్థుల వివరాలను నోటీసు బోర్డులో పొందుపర్చాలని ఆదేశించారు. కలెక్టర్ వెంట ఎన్నికల పరిశీలకుడు గంగాధర్ ఉన్నారు.
