ఇస్లామాబాద్: పాక్ మాజీ ప్రధాని, పాకిస్తాన్ తెహ్రీక్ -ఇ -ఇన్సాఫ్ చైర్మన్ ఇమ్రాన్ ఖాన్‌ పై మాజీ ప్రధాని నవాజ్ షరీఫ్ కుమార్తె, పాకిస్తాన్ ముస్లిం లీగ్ నవాజ్ (పీఎంఎల్-ఎన్) సీనియర్ వైస్ ప్రెసిడెంట్ మర్యమ్ నవాజ్.. తీవ్ర వ్యాఖ్యలు చేశారు. ఇమ్రాన్ పార్టీ నుంచి కీలక నేతలు వరుసగా బయటకు వచ్చేస్తున్నారని ఇక ఇమ్రాన్ ఆట ముగిసినట్టేనని చెప్పారు. వెహారిలో జరిగిన పీఎంఎల్-ఎన్ యువజన సదస్సులో ఆమె మాట్లాడుతూ.. ఈ నెల 9న ఇమ్రాన్ ఖాన్‌‌‌‌ను అరెస్టు చేసిన తర్వాత పాకిస్తాన్ అంతటా చోటుచేసుకున్న హింసాత్మక ఘటనలు, నిరసనల గురించి ఆమె మాట్లాడారు.
9వ తేదీన చోటు చేసుకున్న హింసకు ఇమ్రానే కారణమని ఆ పార్టీ నుంచి బయటకు వచ్చిన వారు చెపుతున్నారని అన్నారు. రావల్పిండిలోని జనరల్ హెడ్‌ క్వార్టర్స్, లాహోర్ కోర్ కమాండర్ హౌస్ (జిన్నా హౌస్)తో సహా సైనిక సంస్థలపై దాడుల తర్వాత భద్రతా దళాలు ఇమ్రాన్ పార్టీకి వ్యతిరేకంగా అణచివేత ప్రారంభించాయి. దీంతో పాకిస్తాన్ తెహ్రీక్ -ఇ -ఇన్సాఫ్ నాయకుల వలసలు ప్రారంభమయ్యాయి. ఘర్షణల తర్వాత 70 మంది లాయర్లు, నాయకులు ఆ పార్టీ నుంచి బయటకు వచ్చారు. అయితే, “నాయకుడే సరిగా లేనప్పుడు ప్రజలు అతని వైపు ఎలా నిలబడతారు?’’ అని ఇమ్రాన్ ఖాన్‌‌‌‌ను మర్యమ్ నవాజ్ ఎద్దేవా చేశారు.
