- లిక్విడ్ రూపంలో సప్లయ్
- యువతే టార్గెట్గా అమ్మకాలు
- స్థానికంగా ఏజెంట్లను నియమించుకొని సెల్లింగ్
- మత్తుకు బానిసవుతున్న జిల్లా యూత్
కామారెడ్డి, వెలుగు: జిల్లాలో గంజాయి అమ్మకాలు జోరుగా సాగుతున్నాయి. యువతే లక్ష్యంగా చేసుకొని మత్తులోకి దించుతున్నారు. ఏపీలోని విశాఖ కేంద్రంగా కామారెడ్డికి గంజాయిసప్లయ్ అవుతున్నట్లు తెలుస్తోంది. పొడి రూపంలో కాకుండా లిక్విడ్ గా ఉన్న గాంజాను సప్లయ్ చేస్తున్నారు. గతంలో జిల్లాలో జోరుగా గంజాయి సాగు చేసేవారు. పండించిన గంజాయిని వివిధ ఏరియాలకు సప్లయ్ చేసేవారు.
కొన్నాళ్లుగా గంజాయి పండించే, సప్లయ్ చేసే వారిపై జిల్లా యంత్రాంగం కఠినంగా వ్యవహరించడంతో గంజాయి సాగు ఆగింది. కొంతకాలంగా మళ్లీ ఇక్కడికి ఏపీలోని విశాఖ ఏరియా నుంచి సప్లయ్అవుతోంది. జిల్లాకు సమీపంలో ఉన్న మహరాష్ట్రకు కూడా సప్లయ్ చేస్తున్నారు. జిల్లాకేంద్రం రాష్ట్ర రాజధాని హైదరాబాద్కు సమీపంలో ఉండడం, రైల్వే లైన్లు, హైవేల కారణంగా రవాణా సులభమవుతోంది.
ఈ పరిస్థితుల్లో విశాఖ జిల్లాతో పాటు, హైదరాబాద్కు చెందిన పలువురు గంజాయి వ్యాపారులు కామారెడ్డిపై ఫోకస్ పెట్టారు. స్థానికంగా ఏజెంట్లను అపాయింట్ చేసుకొని వారి ద్వారా జోరుగా గంజాయి అమ్మకాలు సాగిస్తున్నారు.
శివారు ఏరియాలు అడ్డగా..
జిల్లా కేంద్రంతో పాటు, శివారు ఏరియాలను అడ్డాలుగా చేసుకొని గంజాయి విక్రయాలు సాగుతున్నాయి. ఒకరి ద్వారా మరొకరికి నమ్మకంగా గంజాయి మార్కెట్ను పెంచుకుంటున్నారు. చిన్నచిన్న ప్యాకెట్ల రూపంలో అమ్మకాలు చేస్తున్నారు. టౌన్లో టీ స్టాల్స్, హోటళ్లలో యువకులు అధికంగా ఉండే ఏరియాల్లో విక్రయాలు జరుపుతున్నారు. జిల్లా కేంద్రానికి సమీపంలోని భిక్కనూరు, దోమకొండ, మాచారెడ్డి, సదాశివ్నగర్, రామారెడ్డి తదితర ఏరియాల్లో పలువురు ఫామ్హౌజ్లు కట్టుకున్నారు. ఈ ప్రాంతాల్లో నిఘా లేకపోవడం, జనసంచారం తక్కువగా ఉండడంతో ఫామ్హౌజ్లే కేంద్రాలుగా కొందరు గంజాయి తాగుతున్నారు.
లిక్విడ్ రూపంలో..
కామారెడ్డికి గంజాయి పొడితో పాటు లిక్విడ్రూపంలో సప్లయ్ అవుతోంది. ఎవరికీ అనుమానం రాకుండా లిక్విడ్గా మార్చి చిన్న సీసాల్లో నింపి అమ్ముతున్నారు. కామారెడ్డి మండలం క్యాసంపల్లి శివారులో ఇటీవల ఏడుగురు యువకులు గంజాయి తాగుతూ దేవునిపల్లి పోలీసులకు పట్టుబడ్డారు. వీరంతా 26 నుంచి 30 ఏండ్ల మధ్య ఉన్న వారే. వీరిలో టౌన్కు చెందిన ప్రముఖులు, వ్యాపారుల పిల్లలు ఉన్నారు. వీరి నుంచి 190 గ్రాముల లిక్విడ్గంజాయి దొరికింది. దీని విలువ రూ.97,500 ఉంటుందని పోలీసులు వెల్లడించారు. పోలీస్, ఎక్సైజ్ యంత్రాంగం ప్రత్యేక నిఘా పెట్టి మత్తు పదార్థాల రవాణాను అరికట్టాల్సిన అవసరముంది.
