తెలంగాణ ప్రభుత్వం పలు ఉద్యోగాల భర్తీకి సంబంధించి ఇప్పటికే నోటిఫికేషన్లు ఇచ్చింది. టీచర్ల పోస్టుల భర్తీకి సంబంధించి కూడా కసరత్తు జరుగుతున్నట్లు తెలుస్తున్నది. టీచర్గా నియామకం కాబోయే అభ్యర్థికి టెట్అర్హత తప్పనిసరి. కాబట్టి రాష్ట్ర ప్రభుత్వం మరో టెట్ నిర్వహించాలి. ఎన్సీఆర్టీ నిబంధనల ప్రకారం సంవత్సరానికి రెండు సార్లు టెట్నిర్వహించాల్సి ఉంటుంది. కానీ రాష్ట్రంలో ఏటా రెండు సార్లు టెట్పరీక్ష పెట్టడం లేదు. టెట్ క్వాలిఫై కాని అభ్యర్థులు, వివిధ కారణాలతో టెట్పరీక్ష రాయలేకపోయిన అభ్యర్థులు పరీక్ష నిర్వహణ కోసం ఎదురు చూస్తున్నారు. టీచర్ పోస్టు భర్తీకి సంబంధించి నోటిఫికేషన్విడుదల చేయడానికి కొంత సమయం పట్టనున్న నేపథ్యంలో టెట్పరీక్ష పెట్టాలి.
అలాగే, తెలంగాణ ప్రభుత్వం ఎస్జీటీ వారి కోసం పేపర్1, స్కూల్ అసిస్టెంట్ కోసం పేపర్ 2 నిర్వహిస్తున్నది. ఈ పరీక్ష విధానం వల్ల తెలుగు, హిందీ, ఉర్దూ, భాషా పండిట్ అభ్యర్థులు తీవ్రంగా నష్టపోతున్నారు. లాంగ్వేజ్ పండిట్ ల కోసం మన పక్క రాష్ట్రం ఆంధ్రప్రదేశ్ పేపర్3 నిర్వహిస్తున్నది. అదే విధానాన్ని మన తెలంగాణలోనూ కొనసాగించాలి. లాంగ్వేజ్ పండిట్ లు పేపర్ 2 రాయడంలో ఇబ్బంది పడుతున్నారు. ఈ పేపర్లో పండిట్ లకు సంబంధం లేని సోషల్, మాథ్స్, సబ్జెక్టులకు సంబంధించి 60 మార్కులు ఉంటాయి. దీంతో టెట్ క్వాలిఫై కాలేకపోతున్నామని వారు ఆందోళన చెందుతున్నారు. అందుకే తమకు పేపర్ 3
నిర్వహించాలని కోరుతున్నారు. - దేవులపల్లి రమేశ్,ఉస్మానియా యూనివర్సిటీ
