మంచిర్యాల, వెలుగు: ప్రభుత్వం నిర్ణయించిన ధరలకే వ్యాపారులు బియ్యం అమ్మకాలు సాగించాలని కలెక్టర్కుమార్దీపక్ఆర్డర్స్ జారీ చేశారు. మంగళవారం మంచిర్యాల జిల్లా కేంద్రం మెయిన్ రోడ్డులో ప్రభుత్వ ధరలకు బియ్యం విక్రయాలు జరిపేందుకు శ్రీనాథ్ ట్రేడర్స్ యాజమాన్యం కొత్తగా ఏర్పాటు చేసిన అవుట్ లెట్ను ఆయన ప్రారంభించారు.
ప్రభుత్వం నిర్దేశించిన గరిష్ఠ ధరలకు మించి అమ్మకాలు జరుపకూడదని, నిబంధనలను ఉల్లంఘించే వారిపై చర్యలు తీసుకుంటామని కలెక్టర్హెచ్చరించారు. బీపీటీ, హెచ్ఎంటీ తదితర రకాల బియ్యాన్ని ప్రభుత్వ ధరలకు అందించేందుకు గజానన్ ఇండస్ట్రీస్ ముందుకు రావడం అభినందనీయమన్నారు.
ఎల్ నినో ప్రభావం వల్ల ప్రస్తుతం మార్కెట్లో నెలకొన్న పరిస్థితుల నేపథ్యంలో బియ్యం వ్యాపారులు, ట్రేడర్లు అందరూ మానవతా దృక్పథంతో వ్యవహరిస్తూ ప్రజలకు బియ్యం ధరలను అందుబాటులో ఉంచాలని కోరారు. నిర్ణీత ధరలకే విక్రయాలు జరిగేలా రెవెన్యూ, సివిల్ సప్లైస్ అధికారులతో ఆకస్మిక తనిఖీల కోసం స్పెషల్ టీమ్లను ఏర్పాటు చేస్తామని చెప్పారు.
తనిఖీల కోసం వచ్చే అధికారులకు వ్యాపారులు, ట్రేడర్లు సహకరించాలని సూచించారు. 26 కిలోల ప్రీమియం క్వాలిటీ బీపీటీ రా రైస్ బ్యాగ్ను రూ.1430, హెచ్ఎంటీ స్టీమ్ రకం బియ్యం బస్తా రూ.1898 చొప్పున అవుట్ లెట్ ద్వారా విక్రయిస్తున్నామని నిర్వాహకులు తెలిపారు. వాటికి సంబంధించిన ధరల పట్టికను ప్రదర్శించారు. ఇన్చార్జి డీసీఎస్వో వేణుగోపాల్ పాల్గొన్నారు.
