న్యూఢిల్లీ : హెచ్‌‌‌‌డీఎఫ్‌‌‌‌సీ బ్యాంక్ స్టాండ్‌‌‌‌లోన్ లాభం ఈ ఏడాది సెప్టెంబర్తో ముగిసిన రెండో క్వార్టర్లో 5 శాతం పెరిగి రూ.16,821 కోట్లకు చేరుకుంది. ఈ ప్రైవేట్ రంగ బ్యాంకు ఏడాది క్రితం ఇదే క్వార్టర్లో రూ.15,976 కోట్ల నికర లాభాన్ని ఆర్జించింది. సమీక్షిస్తున్న క్వార్టర్లో మొత్తం ఆదాయం రూ. 78,406 కోట్ల నుంచి రూ. 85,500 కోట్లకు పెరిగిందని హెచ్‌‌‌‌డీఎఫ్‌‌‌‌సీ బ్యాంక్ రెగ్యులేటరీ ఫైలింగ్‌‌‌‌లో తెలిపింది. ఈ క్వార్టర్లో బ్యాంక్ వడ్డీ ఆదాయాన్ని రూ.74,017 కోట్లుగా నివేదించింది. క్రితం ఏడాది ఇదే కాలంలో రూ.67,698 కోట్లు వచ్చాయి.
నికర వడ్డీ ఆదాయం (ఎన్ఐఐ) గత సంవత్సరం రెండో క్వార్టర్లో రూ. 27,390 కోట్ల నుంచి రూ. 30,110 కోట్లకు మెరుగుపడింది. ఇది 10 శాతం వృద్ధిని నమోదు చేసింది. బ్యాంక్ స్థూల నిరర్థక ఆస్తులు (ఎన్పీఏలు) స్వల్పంగా క్షీణించాయి. సెప్టెంబర్ 2024 నాటికి స్థూల రుణాలలో ఇవి 1.36 శాతానికి పెరిగాయి. ఏడాది క్రితం 1.34 శాతం ఉన్నాయి. నికర ఎన్‌‌‌‌పీఎలు లేదా మొండి బకాయిలు గత ఆర్థిక సంవత్సరం రెండవ క్వార్టర్ ముగింపులో 0.35 శాతం నుంచి 0.41 శాతానికి పెరిగాయి. కన్సాలిడేటెడ్ ప్రాతిపదికన, బ్యాంక్ నికర లాభం 6 శాతం వృద్ధితో రూ.17,826 కోట్లకు చేరుకుంది.
