మార్కెట్లో బంగారం ధర10 గ్రాములకు నలభై వేల దాకా ఉంది. ఈ పరిస్థితుల్లో బంగారం కొనే ధైర్యం చేయాలంటే సాహసమే అనుకోవాలి. కానీ.. బంగారు పళ్లెంలో తినాలని కోరిక పుడితే.. గోల్డెన్ స్పూన్తో ఫుడ్ టేస్ట్ చేయాలని ఆశ కలిగితే.. బంగారు బాత్టబ్లో స్నానం చేయాలని మనసు కోరుకుంటే.. ‘ఏంటీ.. ఆశకు హద్దుండాలి’ అనాలనిపిస్తుందా? వియత్నాంలోని గోల్డెన్ బే దనాంగ్ హోటల్కెళ్తే పై కోరికలన్నీ తీరిపోతాయి.
ఇంతకీ ఆ బంగారు హోటల్ ఎక్కడుందా అని ఆలోచిస్తున్నారా? వియత్నాంలో ఉంది. అక్కడికెళ్లి ‘గోల్డెన్ బే దనాంగ్ హోటల్’ అని ఎవరిని అడిగినా.. కళ్లు మూసుకొని అడ్రస్ చెప్తారు. ఆ హోటల్కెళ్లి హ్యాండ్వాష్ చేసుకోవాలన్నా.. బంగారు వాష్ బేసిన్లే ఉంటాయి. నల్లాలు కూడా బంగారంతో చేసినవే ఉంటాయి. టేబుల్ మీద కూర్చొని ఫుడ్ ఆర్డరిస్తే.. సప్లై చేసే గిన్నెలు, వడ్డించే స్పూన్లు, తినే ప్లేట్లు, నీళ్లు తాగే గ్లాసులు అన్నీ బంగారుమయమే. ఆ ప్లేట్లలో పెట్టుకొని తింటుంటే.. తిండి కంటే ఎక్కువ ఆ బంగారు పాత్రల మీదనే ఎక్కువ దృష్టి పెడతారేమో జనాలు.
అంతెందుకూ.. గోల్డెన్ బే దనాంగ్ హోటల్లోని ప్రెసిడెంట్ సూట్లో బాత్రూమ్ ఫిట్టింగ్, బట్టలు వేలాడేసుకునే హ్యాంగర్లు కూడా బంగారువే ఉంటాయి తెలుసా. సరదాగా స్నానం చేయాలనిపిస్తే.. బంగారు ఈత కొలనులో.. అదేనండీ.. స్విమ్మింగ్పూల్లో ‘జలకాటలలో.. ఏమి హాయిలే అలా..’ అంటూ విలాసంగా స్నానం చేయొచ్చు. బంగారు సోప్ బాక్స్లోంచి సబ్బు తీసుకొని రాజభోగం అనుభవించవచ్చు.
అంతేనా చీకటైతే చాలు.. టాప్ వ్యూ నుంచి ఫైర్వర్క్స్ చూడాలంటే.. రెండు కళ్లు సరిపోవు. లాంజ్లో కూర్చుని కింద జిగేల్మనిపించే స్విమ్మింగ్పూల్ చూస్తుంటే.. ఈ ప్రపంచాన్ని మరిచిపోవచ్చు. 24 క్యారెట్ల బంగారంతో కట్టిన స్విమ్మింగ్ పూల్ చూడాలే గానీ.. దాని గురించి ఎంత మాట్లాడుకున్నా తక్కువే. నిత్యం జరిగే రకరకాల ఈవెంట్లకు సంబంధించిన లైటింగ్ఎఫెక్ట్, ఫైర్ వర్క్స్ రాత్రిని మైమరిపించి మిరిమిట్లు గొలిపే వెలుగును పంచుతాయి. ఈ హోటల్లో ఉండే లగ్జరీ సేవలకు వసూలు చేసే డబ్బులు కూడా లగ్జరీగానే ఉంటాయి. ఆసియాలోనే అత్యంత విశాలమైన, విలాసమైన హోటల్ ఇదే.
ఈ హోటల్లో మొత్తం 949 రూమ్స్ ఉన్నాయి. అన్నీ రూముల్లో గోల్డ్తో ఫీచరింగ్ చేసిన వస్తువులే ఉంటాయి. కస్టమర్ల కోసం ఏడు రెస్టారెంట్లు, బార్లు ఉన్నాయి. అక్కడ వడ్డించే మద్యం, ఫుడ్ కూడా బంగారు పాత్రల్లోనే. ఈ హోటల్ల్లోకి అడుగుపెడితే.. ఎవరైనా గోల్డెన్ స్పూన్తో తినాల్సిందే. ఏదైనా దావత్ చేయాలంటే కనీసం 300 మందికి తగ్గకుండా అతిధులకు ఏర్పాట్లు చేయవచ్చు. ఇక్కడి 949 రూమ్స్లో ప్రతీ రూమ్ నుంచి సముద్రం, పర్వతాలు 360 డిగ్రీల కోణంలో కనిపిస్తాయి. అదే ఇక్కడి మరో స్పెషాలిటీ. ఈ గోల్డెన్ హోటల్లో ఒక్క రాత్రి గడపాలంటే మన కరెన్సీలో దాదాపు ఏడు వేల రూపాయలు ఇస్తే చాలు.
