- సూర్యాపేట ప్రభుత్వ జూనియర్ కాలేజీలో భారీ బహిరంగ సభ
సూర్యాపేట, వెలుగు: కాంగ్రెస్ ప్రభుత్వం ఎన్నికల ముందు కల్లుగీత కార్మికులకు ఇచ్చిన హామీలు అమలు చేయకపోతే రేవంత్ ప్రభుత్వానికి తమ సత్తా చూపుతామని తెలంగాణ కల్లుగీత సంఘం రాష్ట్ర అధ్యక్షులు ఎం.వి.రమణ ఆరోపించారు. శుక్రవారం సూర్యాపేట జిల్లా కేంద్రంలో ప్రభుత్వ జూనియర్ కళాశాలలో తెలంగాణ కల్లుగీత కార్మిక సంఘం నాలుగవ రాష్ట్ర మహాసభల సందర్భంగా ఏర్పాటు చేసిన బహిరంగ సభకు ముఖ్య అతిథిగా హాజరై ప్రసంగించారు.
ప్రతి సొసైటీకి 5 ఎకరాల భూమి ఇవ్వాలని డిమాండ్ చేశారు. మల్లన్న సాగర్ ముంపులో ఇళ్లు కోల్పోయిన వారికి ఇంటి నిర్మాణంతో పాటు, వృత్తి, ఉపాధి కల్పించాలని రాష్ట్ర డిమాండ్ చేశారు. రాష్ట్రంలో రోజుకొక గ్రామంలో కల్లుగీత కార్మికుడు తాటి చెట్టు మీద పడి చనిపోతున్నాడని వారిని కనీసం పరామర్శించే తీరిక ఎక్సైజ్ శాఖ మంత్రి జూపల్లి కృష్ణారావుకు లేదా అని ప్రశ్నించారు. కేంద్రంలో అధికారంలో ఉన్న బీజేపీ ప్రభుత్వం కల్లుగీత కార్మికుల సంక్షేమానికి ఎలాంటి స్కీములు ప్రవేశపెట్టలేదన్నారు.
నిత్యం స్వదేశీ వస్తువులను వాడాలని చెప్పే బీజేపీ నాయకులు స్వదేశీ కల్లును, నీరాను ఎందుకు ప్రచారం చేయడం లేదని ప్రశ్నించారు. కల్లుగీత కార్మిక సంఘం రాష్ట్ర మహాసభల్లో కల్లుగీత కార్మికులు ఎదుర్కొంటున్న సమస్యలపై చర్చించి భవిష్యత్తు పోరాటాలకు రూపకల్పన చేస్తామన్నారు. కల్లుగీత కార్మికుల సమస్యను రాష్ట్ర ప్రభుత్వం పట్టించుకోకపోతే అసెంబ్లీని ముట్టడిస్తామని హెచ్చరించారు
పెండింగ్ ఎక్స్ గ్రేషియాలు ఇవ్వాలి
కల్లు గీత వృత్తి చేసే వారందరికీ కాటమయ్య రక్షణ కవచం ఇవ్వాలని తెలంగాణ కల్లు గీత కార్మిక సంఘం రాష్ట్ర ప్రధాన కార్యదర్శి బెల్లంకొండ వెంకటేశ్వర్లు అన్నారు. రాష్ట్రవ్యాప్తంగా పెండింగ్ లో ఉన్న కల్లుగీత కార్మికుల ఎక్స్ గ్రేషియా వెంటనే చెల్లించాలన్నారు. తెలంగాణ కల్లుగీత కార్మిక సంఘం రాష్ట్ర నాలుగో మహాసభల సందర్భంగా ఆ సంఘం రాష్ట్ర అధ్యక్షులు ఎం.వి. రమణ రచించిగా ప్రముఖ కళాకారులు మానుకోట ప్రసాద్ ఆలపించిన ‘ మోకు పైలం మోయి గౌడ బింకి పైల మోయి గౌడ’ అనే పాటల సీడీని హైదరాబాద్ సుప్రజా హాస్పిటల్ ఎండీ సిగ విజయ్ కుమార్ గౌడ్ ఆవిష్కరించారు.
తెలంగాణ కల్లుగీత కార్మిక సంఘం రాష్ట్ర నాలుగో మహాసభల సందర్భంగా సూర్యాపేట పట్టణంలోని బాలాజీ రైస్ మిల్ నుంచి వేలాది మంది కల్లుగీత కార్మికులు మోకు, ముత్తాదులు, తాటి, ఈత కొమ్మలతో ప్రదర్శనలో పాల్గొన్నారు. కల్లుగీత కార్మిక సంఘం సూర్యాపేట జిల్లా అధ్యక్షులు ఎలుగురి గోవిందు అధ్యక్షతన జరిగిన ఈ బహిరంగ సభలో కల్లు గీత కార్మిక సంఘం రాష్ట్ర ఆఫీస్ బేరర్స్ చౌగాని సీతారాములు, బోలగారి జయరాములు బోలగాని జయరాములు, గౌని వెంకన్న, బొల్లె వెంకట మల్లయ్య, ఎస్ రమేష్ గౌడ్, బూడిద గోపి, పామన గుండ్ల అచ్చాలు, ఉష గాని వెంకట నరసయ్య, తదితరులు పాల్గొన్నారు.
