వికారాబాద్ జిల్లాలో నిండు గర్భిణి హత్య కేసులో భర్తకు జీవితఖైదు

•     రూ.5 వేలు జరిమానా 
•     వికారాబాద్‌‌ జిల్లా జడ్జి తీర్పు

వికారాబాద్, వెలుగు: నిండు గర్భిణి హత్య కేసులో భర్తకు వికారాబాద్  జిల్లా న్యాయస్థానం జీవితఖైదుతో పాటు రూ.5 వేలు జరిమానా విధిస్తూ తీర్పు ఇచ్చింది.  వికారాబాద్‌‌  జిల్లా ఎస్పీ స్నేహామెహ్రా శుక్రవారం మీడియాకు వివరాలు వెల్లడించారు. వికారాబాద్  జిల్లా పెద్దేముల్ లోని బండపల్లి గ్రామానికి చెందిన గుండెపల్లి రవి భార్య ఇద్దరు ఆడపిల్లలకు జన్మనిచ్చింది. 

మరోసారి గర్భం దాల్చగా 2016 జనవరి నాటికి 8 నెలల గర్భిణీగా ఉంది. ఇప్పటికే ఇద్దరు ఆడపిల్లలు పుట్టారని రవి తన భార్యను శారీరకంగా, మానసికంగా వేధింపులకు గురిచేసేవాడు. మళ్లీ ఆడపిల్లనే కంటుందేమో అని రవి తన అమ్మ మాటలు విని అనుమానం పెంచుకున్నాడు. తన భార్యను ఎలాగైనా హతమార్చాలనే ఉద్దేశంతో జనవరి 3న అతి కిరాతకంగా గొడ్డలితో హత్య చేశాడు. 

అప్పట్లో తాండూరు రూరల్  సీఐగా ఉన్న సైదిరెడ్డి, పెద్దేముల్ ఎస్ఐ కృష్ణ నిందితుడిపై కేసు నమోదు చేశారు. దర్యాప్తు చేసి కోర్టులో చార్జిషీటు దాఖలు చేశారు. కేసు పూర్వాపరాలు పరిశీలించిన వికారాబాద్‌‌  జిల్లా సెషన్స్  కోర్టు జడ్జి డాక్టర్​ ఎస్.శ్రీనివాస్ రెడ్డి.. దోషికి జీవితఖైదుతో పాటు రూ.5,000 జరిమానా విధిస్తూ తీర్పు వెలువరించారు. 

ఈ కేసు దర్యాప్తులో పాలుపంచుకున్న అధికారులు, సహకరించిన ఇతర ముఖ్య అధికారులైన తాండూరు డీఎస్పీ నర్సింగ్  యాదయ్య, అప్పటి రూరల్  సీఐ సైదిరెడ్డి, అప్పటి ఎస్ఐ కృష్ణ, ప్రస్తుత రూరల్  సీఐ ప్రవీణ్‌‌కుమార్ రెడ్డి, ప్రస్తుత ఎస్ఐ శంకర్‌‌, పబ్లిక్  ప్రాసిక్యూటర్  పి.సుధాకర్ రెడ్డి తదితరులను ఎస్పీ స్నేహామెహ్రా అభినందించారు.