లక్నో: వివాహేతర సంబంధం పెట్టుకుందన్న అనుమానంతో ప్రేమించి పెళ్లి చేసుకున్న భార్యను సజీవ దహనం చేశాడు భర్త. బతికుండగానే భార్యను కుర్చీకి కట్టేసి పెట్రోల్తో నిప్పటించి అత్యంత క్రూరంగా హత్య చేశాడు. అనంతరం ఇంటికి నిప్పంటించి పిల్లలతో కలిసి పారిపోయాడు. ఈ దిగ్భ్రాంతికర ఘటన ఉత్తరప్రదేశ్లోని కనౌజ్ జిల్లాలో చోటు చేసుకుంది. ఈ ఘటనకు సంబంధించిన వివరాలు తెలుసుకుందాం..
కనౌజ్ జిల్లాలోని జగత్‌పూర్‌ నివాసి అయిన సుఖ్‌బీర్ సింగ్ 11 సంవత్సరాల క్రితం సోనమ్ అనే యువతిని ప్రేమ వివాహం చేసుకున్నాడు. వీరికి ఇద్దరు పిల్లలు. కుమారుడి వయస్సు ఏడు సంవత్సరాలు. కుమార్తె ఏజ్ ఐదు సంవత్సరాలు. సుఖ్‌బీర్ హర్యానాలోని హిసార్‌లో ప్రైవేట్ ఉద్యోగం చేస్తూ అక్కడే ఉండేవాడు. అతడి భార్య, పిల్లలు జగత్పూర్లోనే నివాసం ఉంటున్నారు. 15 రోజుల క్రితమే ఆ ఉద్యోగానికి రాజీనామా సొంత గ్రామానికి వచ్చాడు.
ఈ క్రమంలో గ్రామానికి చెందిన ఒక యువకుడితో తన భార్యకు ఉన్న అక్రమ సంబంధం గురించి అతనికి తెలిసింది. దీంతో సుఖ్‌బీర్ భార్యపై నిఘా పెట్టడం మొదలుపెట్టాడు. ఒక రోజు సోనమ్ ప్రియుడితో ఫోన్ మాట్లాడుతూ భర్తకు రెడ్ హ్యాండెడ్‌గా దొరికింది. ఈ విషయంపై భార్యభర్తలు మధ్య గొడవలు జరుగుతున్నాయి. గురువారం (నవంబర్ 5) కూడా ఇదే విషయంపై భార్యభర్తల మధ్య మరోసారి తీవ్ర వాగ్వాదం జరిగింది.
ప్రేమించి పెళ్లి చేసుకున్న భార్య తనను మోసం చేసిందన్న బాధ, కోపం, ఆవేశంలో సుఖ్‌బీర్ దారుణానికి ఒడిగట్టాడు. భార్యను కుర్చీకి కట్టేసి ఆమెపై పెట్రోల్ పోసి నిప్పంటించి సజీవ దహనం చేశాడు. అనంతరం పిల్లలతో కలిసి పారిపోయాడు. సుఖ్‌బీర్ ఇంట్లో నుంచి మంటలు, సోనమ్ అరుపులు విన్న స్థానికులు హుటాహుటిన ఘటన స్థలానికి చేరుకున్నారు. వెంటనే పోలీసులు, అగ్నిమాపక దళానికి సమాచారం అందించారు.
హుటాహుటిన ఘటన స్థలానికి చేరుకున్న పోలీసులు, అగ్నిమాపక సిబ్బంది సహయక చర్యలు చేపట్టారు. సుమారు గంటన్నర శ్రమ తర్వాత మంటలను అదుపులోకి తీసుకువచ్చారు. అగ్నిమాపక సిబ్బంది ఇంట్లోకి ప్రవేశించే సమయానికి సోనమ్ మృతి చెందింది. పోలీసులు ఈ ఘటనపై కేసు నమోదు చేసుకుని దర్యాప్తు చేపట్టారు. పరారీలో ఉన్న సుఖ్‌బీర్ కోసం గాలింపు చర్యలు చేపట్టారు. భార్యను సజీవ దహనం చేసిన ఘటనతో జగత్‌పూర్‌ గ్రామ వాసులు భయాందోళనకు గురయ్యారు.
