కలలో కూడా అనుకోలేదు.. యాక్సిడెంటల్‎గా యాక్టర్నైపోయా: మాథ్యూ

ఓటీటీ ట్రెండ్ మొదలైనప్పటి నుంచి ప్రేక్షకులంతా భాషాభేదం లేకుండా సినిమాలు, సిరీస్​లు తెగ చూసేస్తున్నారు. అందులో ముఖ్యంగా మలయాళం నుంచి వచ్చే ప్రాజెక్ట్స్​ అంటే మరింత ఇంట్రెస్ట్​ చూపిస్తున్నారు. దీంతో మలయాళం యాక్టర్స్​ కూడా అన్ని భాషల్లోనూ ఆడియెన్స్​ని ఆకట్టుకుంటున్నారు. అంతేకాదు.. కొందరు నటుల నుంచి కొత్త ప్రాజెక్ట్స్ వస్తున్నాయంటే ఎప్పుడెప్పుడు చూద్దామా..? అని ఎదురుచూస్తున్నారు కూడా. అలాంటి వాళ్లలో పెద్ద పెద్ద స్టార్స్​ మాత్రమే కాదు.. యంగస్టర్స్​ కూడా చాలామందే ఉన్నారు. వాళ్లలో ఒకరే మాథ్యూ థామస్​. నిజానికి ఈ పేరు తెలుగు ఆడియెన్స్​లో చాలామందికి తెలియదు. కానీ, ఇతన్ని చూస్తే మాత్రం ఫలానా సినిమాలో ఉన్నాడు అని టక్కున గుర్తుపట్టేస్తారు. అలాంటి క్రేజ్​ సంపాదించుకున్న ఈ యాక్టర్ జర్నీ విశేషాలు ఈ వారం పరిచయంలో..

మాథ్యూ నటించిన సినిమాలు ఓటీటీలో డబ్బింగ్​ వెర్షన్‎లో రిలీజ్ అయ్యాయి. కానీ, తెలుగు ప్రేక్షకులకు బాగా గుర్తుండిపోయేది మాత్రం తమిళ నటుడు ధనుష్ డైరెక్షన్​లో వచ్చిన ‘జాబిలమ్మ నీకు అంత కోపమా” సినిమాతోనే. ఎందుకంటే ఆ సినిమాలో హీరో ఫ్రెండ్​ పాత్రలో నటించిన మాథ్యూ ప్రేక్షకుల్ని అంతగా అలరిస్తాడు. ప్రస్తుతం ‘లవ్​లీ’ అనే ఫాంటసీ మూవీ ఓటీటీలో రిలీజ్ కానుంది. ఇందులో ఒక ఈగతో ఫ్రెండ్​షిప్​ చేసే కుర్రాడిలా కనిపిస్తాడు మాథ్యూ. 

ఇక మాథ్యూ పర్సనల్ లైఫ్ విషయానికొస్తే..  మాథ్యూ కేరళలోని ఎర్నాకులం జిల్లాలో తిరువంకుళంలో 2002లో పుట్టాడు. తండ్రి బిజు జాన్..​ ఇంజినీర్​. తల్లి సూసన్ కె మాథ్యూ.. స్కూల్ టీచర్. తనకు ఒక బ్రదర్ ఉన్నాడు. అతని పేరు జాన్ థామస్.. సోషల్ వర్కర్. మాథ్యూ తమిళనాడులోని ‘ఆదిశక్తి లాబొరేటరీ ఫర్ థియేటర్ ఆర్ట్ రీసెర్చ్​’లో జరిగిన యాక్టింగ్​ సెషన్​లో పర్ఫార్మెన్స్​లు ఇచ్చాడు. ఇతర ఫ్యాషన్ షోల్లో మోడల్​గా ర్యాంప్​ వాక్​ కూడా చేశాడు. 

టెన్త్​లోనే కెరీర్​ స్టార్ట్​

మాథ్యూ పదో తరగతిలో ఉన్నప్పుడు ‘కుంబలాంగి నైట్స్’ అనే సినిమాలో ఆడిషన్​ ఇచ్చాడు. ఆ ఏడాది పరీక్షలు అయిపోయాక సినిమా షూటింగ్ మొదలైంది. ఆ సినిమాలో తన పాత్ర కోసం మాథ్యూ స్విమ్మింగ్, కుకింగ్, ఫుట్​బాల్ ప్లేయింగ్, సెయిలింగ్ వంటి కొన్ని యాక్టివిటీస్ నేర్చుకున్నాడు. 2019లో వచ్చిన ఈ సినిమా తన కెరీర్​ని మలుపు తిప్పింది. ఈ సినిమా సక్సెస్ అయ్యాక ఇంటర్వ్యూలో మాట్లాడుతూ ‘‘ఈ సినిమాలో నా పాత్ర ఎలా ఉంటుందో నిజ జీవితంలో నేనూ అలానే ఉంటాను. చాలా మౌనంగా ఉంటాను. అవసరమైనప్పుడే మాట్లాడుతుంటాను” అని తన గురించి చెప్పాడు. 

కలలో కూడా అనుకోలేదు

‘‘యాక్టర్​ని అవుతానని కలలో కూడా అనుకోలేదు. నటుడిగా నన్ను నేనెప్పుడూ ఊహించుకోలేదు కూడా. యాక్సిడెంటల్​గా యాక్టర్​నైపోయా. ఆరేండ్లుగా సక్సెస్​ఫుల్​గా నటిస్తున్నానంటే ఒక్కోసారి నాకే ఆశ్చర్యమనిపిస్తుంది. నటన ప్రత్యేకంగా ఎక్కడా నేర్చుకోలేదు. సినిమాలు చూడడమే నా మొదటి ఇన్​స్పిరేషన్. సినిమాలు చూస్తూ నటన నేర్చుకోవడం అలవాటు చేసుకున్నా. నేను చేసే ఒక్కో సినిమా నుంచి కొంత నేర్చుకుంటూ ఉంటాను.

 నా స్కిల్స్​ని మెరుగుపరుచుకుంటూనే ఉంటాను. సక్సెస్ వచ్చినా రాకపోయినా ఎక్స్​పరిమెంట్స్ చేయడం ఇంపార్టెంట్ అని నమ్ముతా. ఎందుకంటే సినిమాల్లో ప్రతీది ట్రై చేస్తూ ఉండాలి. ఏది సక్సెస్ అవుతుందో.. ఏది కాదో.. గ్యారెంటీగా చెప్పలేం ఈ బిజినెస్​లో. అలాగే ఇండస్ట్రీలో నాతోటి వాళ్లు కూడా మంచి ప్రాజెక్ట్స్​లో సక్సెస్​ఫుల్​గా దూసుకెళ్తున్నారు. వాళ్లను చూసి ఎప్పుడూ అసూయపడలేదు. మా మధ్య ఉండేది హెల్దీ కాంపిటీషన్​ మాత్రమే. ఒకరి సినిమాకు మరొకరం సపోర్ట్ చేసుకుంటుంటాం’’ అంటున్నాడు మాథ్యూ థామస్. 

మాస్ ఆడియెన్స్​కి నచ్చేలా..

కెరీర్​ బిగినింగ్​ నుంచి ఏడాదికి రెండుమూడు ప్రాజెక్ట్స్​కి పైగా చేస్తూ బిజీ  ఉంటాడు మాథ్యూ. తను నటించిన ప్రతి ప్రాజెక్ట్​ ఎంతో కొంత తనకు ఉపయోగపడింది. వాటిలో కొన్ని లీడ్ యాక్టర్‌‌‌‌‌‌‌‌గా, మరికొన్ని సపోర్టింగ్ రోల్స్​ చేశాడు. పాత్ర ఏదయినా సరే తనకంటూ గుర్తింపు దక్కే విధంగా స్ర్కిప్ట్ సెలక్షన్​ చేసుకోవడం మాథ్యూ ప్రత్యేకత అనే చెప్పొచ్చు.

అయితే తన స్క్రిప్ట్​ సెలెక్షన్ ఎలా ఉంటుంది అని అడిగితే.. ‘‘ఫలానా జానర్​లోనే నటించాలని నియమం ఏం పెట్టుకోలేదు. నేను ఎక్కువగా కమర్షియల్ మూవీస్​కి ఇంపార్టెన్స్ ఇస్తా. మాస్ ఆడియెన్స్​కి నచ్చే కథలే నాకు నచ్చుతాయి. ఎంటర్​టైన్ చేస్తూనే ఏదో ఒక మంచి విషయాన్ని చెప్పే కథలంటే చాలా ఇష్టం. వాళ్ల టైం కేటాయించి, డబ్బులు పెట్టి థియేటర్​కి వచ్చి సినిమా చూస్తున్నవాళ్లకు శాటిస్​ఫాక్షన్ ఇవ్వాలి. అలా అనుకునే నా స్క్రిప్ట్స్ ఎంచుకుంటాను” అని చెప్పాడు. 

తమిళంలో విజయ్ కొడుకుగా..

‘కుంబలాంటి నైట్స్’ తర్వాత తను నటించిన మరో సినిమా ‘తన్నీర్ మథన్ దినంగల్’. అదే ఏడాదిలో రిలీజ్ అయిన ఆ సినిమా కూడా సక్సెస్​ని అందించింది. దాంతోపాటు మాథ్యూకి రెండు అవార్డులు సొంతమయ్యాయి. సరిగ్గా పాతికేండ్లు కూడా నిండని ఈ యంగ్​స్టర్​ మలయాళంతోపాటు తమిళంలోనూ సక్సెస్​ఫుల్ సినిమాల్లో నటించాడు. ​తన మొదటి సినిమానే తమిళంలో స్టార్​ హీరో విజయ్ నటించిన ‘లియో’. అందులో ఆయన కొడుకు పాత్రలో నటించాడు. ఆ సినిమాతో ఇతర భాషల్లోనూ ప్రేక్షకులకు దగ్గరయ్యాడు. ‘లియో’ సినిమాలో విజయ్​ కొడుకుగా నటించడంతో చూసిన వాళ్లంతా టీనేజ్​లో విజయ్​లానే కనిపిస్తున్నాడని చాలామంది అభిప్రాయపడ్డారు. అయితే ఆ సినిమా ఓకే అయ్యాక డైరెక్టర్ లోకేష్​తో.. ‘‘నాకు తమిళం రాదు.. టెన్షన్​గా ఉందని నా మనసులో ఉన్న డౌట్లు అన్నీ చెప్పా. దాంతో డైరెక్టర్​ నేను రిలాక్స్ అయ్యి కంఫర్ట్​బుల్​గా నటించేందుకు కాస్త టైం ఇచ్చాడు. షూటింగ్ జరిగినన్ని రోజులూ తనకు సపోర్ట్ చేశాడు” అని చెప్పుకొచ్చాడు.