భారత ఆర్థిక వ్యవస్థను ద్రవ్యోల్బణం వెంటాడుతోంది. అక్టోబర్ 2026 నెలలో హోల్సేల్ ద్రవ్యోల్బణం(WPI) ఊహించని విధంగా పెరిగింది. సెప్టెంబరులో 11.39 శాతంగా ఉన్న హోల్సేల్ ధరల ఆధారిత ద్రవ్యోల్బణం.. అక్టోబర్ నాటికి ఏకంగా 12.29 శాతానికి దూసుకెళ్లింది. ఇంధనం, ఎలక్ట్రిసిటీ, ఆహార పదార్థాలు, మినరల్స్ ధరలు ఒక్కసారిగా పెరగడంతోనే ఈ పరిస్థితి తలెత్తినట్లు వాణిజ్య పరిశ్రమల మంత్రిత్వ శాఖ విడుదల చేసిన లెక్కలు స్పష్టం చేస్తున్నాయి.
ముఖ్యంగా దేశంలో ఫ్యూయెల్ అండ్ పవర్ ద్రవ్యోల్బణం అత్యధికంగా 32.84 శాతానికి పెరగడం ఆందోళన కలిగిస్తోంది. అంతకుముందు సెప్టెంబర్లో ఇది 25.85 శాతంగా మాత్రమే ఉండేది. ముడి చమురు, పెట్రోలియం ఉత్పత్తులు, సహజ వాయువు, విద్యుత్ ధరల పెరుగుదల ఇంధన ద్రవ్యోల్బణాన్ని పైకి లాగింది. మరోవైపు ఆహార పదార్థాల ద్రవ్యోల్బణం 8.26 శాతానికి చేరగా, నాన్-ఫుడ్ ఆర్టికల్స్ 11.69 శాతానికి, మినరల్స్ ద్రవ్యోల్బణం ఏకంగా 12.64 శాతానికి ఎగబాకాయి. తయారీ రంగం మాత్రం 9.54 శాతానికి తగ్గి కొంతమేర ఊరటనిచ్చింది.
మరోవైపు రిటైల్ ద్రవ్యోల్బణం(CPI) కూడా అక్టోబర్లో 6.09 శాతానికి చేరుకోవడం గమనార్హం. గత రెండేళ్లలో తొలిసారిగా రిటైల్ ద్రవ్యోల్బణం రిజర్వ్ బ్యాంక్ ఆఫ్ ఇండియా నిర్దేశించిన అప్పర్ లిమిట్ 6 శాతాన్ని దాటింది. హోల్సేల్ అండ్ రిటైల్ ద్రవ్యోల్బణం రెండు రకాలుగానూ ఇలా ఎగబాకడం ఆర్థిక నిపుణుల్లో గుబులు పుట్టిస్తోంది.
ఈ పరిస్థితులతో రాబోయే డిసెంబర్ నెలలో జరిగే రిజర్వు బ్యాంక్ మానిటరీ పాలసీ సమావేశంలో కీలక వడ్డీ రేట్లను పెంచే అవకాశాలున్నాయనే అంచనాలు గట్టిగా వినిపిస్తున్నాయి. పెరిగిపోతున్న ధరల కట్టడికి కేంద్ర బ్యాంకు ఎలాంటి కఠిన నిర్ణయాలు తీసుకుంటుందనే దానిపై ప్రస్తుతం వ్యాపార వర్గాలు, ఇన్వెస్టర్లు ఆసక్తిగా ఎదురుచూస్తున్నారు.
