భారత్‌లో బంగారం దిగుమతులపై కేంద్ర ప్రభుత్వం పన్నులు పెంచడంతో బంగారం అక్రమ రవాణా భారీగా పెరిగింది. వరల్డ్ గోల్డ్ కౌన్సిల్ (WGC) నివేదిక ప్రకారం, ఈ ఏడాది జూలై నుంచి సెప్టెంబర్ మధ్య కాలంలో దేశంలోకి అక్రమంగా వచ్చే బంగారం దిగుమతులు ఏకంగా 1,500 శాతానికి పైగా పెరిగాయి. దిగుమతి సుంకాలు ఎక్కువగా ఉండటంతో కొందరు వ్యాపారులు అక్రమ మార్గాల్లో బంగారాన్ని తెప్పిస్తున్నట్లు నివేదిక వెల్లడించింది.
మెటల్స్ ఫోకస్ అనే కన్సల్టెన్సీ సంస్థ గణాంకాల ప్రకారం, గత ఏడాది జూలై-సెప్టెంబర్ మధ్య కాలంలో భారత్‌కు అక్రమంగా వచ్చిన బంగారం కేవలం 3 టన్నులు మాత్రమే. కానీ ఈ ఏడాది అదే సమయంలో ఆ మొత్తం 50 టన్నులకు చేరింది. 2023 తర్వాత ఇదే అత్యధిక స్థాయి అని WGC తెలిపింది. అయితే ఈ అక్రమ దిగుమతుల లెక్కలను ఏ విధంగా అంచనా వేశారనే వివరాలను నివేదికలో వెల్లడించలేదు.
అక్రమ మార్గాల్లో బంగారం రవాణా ఎందుకు పెరిగిందంటే ?
సాధారణంగా బంగారాన్ని అక్రమంగా దేశంలోకి తీసుకురావడానికి స్మగ్లింగ్‌తో పాటు, చిన్న చిన్న పరిమాణాల్లో బంగారాన్ని తీసుకురావడం వంటి మార్గాలను ఉపయోగిస్తుంటారు. ఇలా తీసుకొచ్చే బంగారంపై అధికారిక దిగుమతి సుంకాలు చెల్లించాల్సిన అవసరం లేకుండా తప్పించుకుంటున్నారు. గతంలో కూడా ప్రభుత్వం దిగుమతి పన్నులు పెంచినప్పుడల్లా అక్రమ బంగారం రవాణా పెరిగినట్లు WGC గుర్తుచేసింది.
ఈ ఏడాది ప్రారంభంలో కేంద్ర ప్రభుత్వం బంగారం, వెండిపై దిగుమతి సుంకాలను భారీగా పెంచింది. గతంలో ఉన్న సుంకాన్ని రెట్టింపు కంటే ఎక్కువగా పెంచి 15 శాతానికి చేర్చింది. పెరుగుతున్న ఇంధన ధరలు, దేశ వాణిజ్య లోటును తగ్గించడం, విలువైన లోహాల దిగుమతులను నియంత్రించడం వంటి లక్ష్యాలతో ఈ నిర్ణయం తీసుకుంది. అయితే ఈ పన్నుల పెంపు వల్ల అక్రమ బంగారం మార్కెట్ మరింత విస్తరించినట్లు నివేదిక చెబుతోంది.
భారత్‌లో బంగారానికి ఎందుకంత డిమాండ్?
ప్రపంచంలో అత్యధికంగా బంగారం వినియోగించే దేశాల్లో భారత్ రెండో స్థానంలో ఉంది. దేశంలో బంగారం ఉత్పత్తి చాలా తక్కువగా ఉండటంతో మన అవసరాలకు ఎక్కువగా విదేశాల నుంచే దిగుమతి చేసుకుంటున్నాం. భారతీయులకు బంగారం అంటే కేవలం ఆభరణం మాత్రమే కాదు. పెళ్లిళ్లు, పండుగలు, మతపరమైన కార్యక్రమాల్లో బంగారం కొనడం ఒక సంప్రదాయంగా కొనసాగుతోంది. అంతేకాకుండా బంగారాన్ని పెట్టుబడిగా, కుటుంబ ఆస్తిగా కూడా భావిస్తారు.
దిగుమతి పన్నులు పెరగడంతో కొంతమంది వ్యాపారులు నగదు లావాదేవీల ద్వారా బంగారం అమ్మకాలు జరుపుతున్నారు. బిల్లులు లేకుండా బంగారం, ఆభరణాలను విక్రయించడం వల్ల ప్రభుత్వానికి పన్నుల రూపంలో ఆదాయం తగ్గే అవకాశం ఉంది. ఇలాంటి లావాదేవీలను గుర్తించడం, బంగారం ఎక్కడి నుంచి ఎక్కడికి వెళ్తుందో తెలుసుకోవడం అధికారులకు కష్టంగా మారుతోంది.
పండుగలు, పెళ్లిళ్ల సీజన్‌లోనూ తగ్గిన కొనుగోళ్లు?
భారత్‌లో బంగారానికి డిమాండ్ సాధారణంగా జూలై-సెప్టెంబర్ త్రైమాసికంలో పెరుగుతుంది. అయితే గత ఏడాదితో పోలిస్తే ఈసారి బంగారం వినియోగం తక్కువగానే ఉన్నట్లు వరల్డ్ గోల్డ్ కౌన్సిల్ నివేదిక పేర్కొంది.
సాధారణంగా అక్టోబర్ నుంచి డిసెంబర్ వరకు దీపావళి, ఇతర పండుగలు, పెళ్లిళ్ల సీజన్ కారణంగా బంగారం కొనుగోళ్లు పెరుగుతాయి. కానీ ఈ ఏడాది మాత్రం కొనుగోళ్లు ఆశించిన స్థాయిలో ఉండకపోవచ్చని అంచనా వేస్తున్నారు. ఇటీవల బంగారం ధరలు తగ్గినప్పటికీ నగల వ్యాపారులు కొత్తగా బంగారం కొనుగోలు చేయడానికి అలోచించి వ్యవహరిస్తున్నారు. ధరలు మరింత తగ్గే అవకాశం ఉందని భావించడంతో ప్రస్తుతం ఎక్కువ మొత్తంలో బంగారం కొనడానికి ఆసక్తి చూపడం లేదు.
తగ్గిన బంగారం ధరలు
అక్టోబర్ నెలలో అంతర్జాతీయ మార్కెట్‌లో బంగారం ధరలు 6.8 శాతం తగ్గాయి. దీంతో ఔన్సు బంగారం ధర 4,000 డాలర్ల కీలక స్థాయి కంటే దిగువకు పడిపోయింది. అప్పటి నుంచి కూడా ధరలు ఆ స్థాయి కంటే తక్కువగానే కొనసాగుతున్నాయి.
ALSO READ : ఫస్ట్ క్లాస్‌ ఏసీ కోచ్‌ ట్రైన్లో భారీ చోరీ.. రూ. 2.5 లక్షల నగలు మాయం, గుక్కపెట్టి ఏడ్చిన మహిళ
బంగారం ధరల్లో వచ్చిన ఈ మార్పులు పండుగలు, పెళ్లిళ్ల సీజన్‌లో కొనుగోళ్లపై ప్రభావం చూపే అవకాశం ఉంది. ధరలు ఇంకా తగ్గుతాయనే అంచనాలతో కొంతమంది కస్టమర్లు కొనుగోళ్లను వాయిదా వేసే పరిస్థితి కనిపిస్తోంది. మొత్తంగా చూస్తే, బంగారంపై దిగుమతి సుంకాలు పెరగడం వల్ల అక్రమ దిగుమతులు భారీగా పెరిగాయి. మరోవైపు ధరల మార్పులు, కొనుగోలుదారుల జాగ్రత్తతో దేశీయ బంగారం మార్కెట్‌లోనూ అనిశ్చితి కొనసాగుతోంది.
