భద్రాచలం, వెలుగు : దుమ్ముగూడెం మండలంలోని రేగుబల్లి గిరిజన బాలికల ఆశ్రమ పాఠశాలను శనివారం ఐటీడీఏ పీవో బి.రాహుల్ తనిఖీ చేశారు. కె.గంగోలు, కొంగవాగు గుంపు జీపీఎస్ పాఠశాలలను పరిశీలించారు. ముందుగా రేగుబల్లి ఆశ్రమ పాఠశాలలో వంట శాలను ఆకస్మికంగా సందర్శించారు.
నిత్యావసర సరుకులు, కూరగాయలు, వండిన వంటలను పరిశీలించారు. స్టోర్ రూం, డార్మెటరీలలో తనిఖీలు చేశారు. మెనూ ప్రకారమే వడ్డిస్తున్నారా? వార్డెన్, స్టాఫ్ తిని పరిశీలించాకే పిల్లలకు పెడుతున్నారా? అని ఆరా తీశారు.
అనంతరం స్టూడెంట్లతో మాట్లాడుతూ ఎవరికీ చెప్పకుండా బయటకు వెళ్లకూడదని, ఖాళీ సమయాలలో కెరీర్ గైడెన్స్ పుస్తకాలు చదవాలని సూచించారు. జీపీఎస్ స్కూళ్లలో ఉద్దీపకం పుస్తకాలను ఎలా చదువుతున్నారో పరీక్షించారు. పీవో వెంట రేగుబల్లి హెచ్ఎం సావిత్రి ,వార్డెన్ పార్వతి ఉన్నారు.
