మాటలు లేకపోయినా మనసులోని ప్రేమను వ్యక్తపరచవచ్చా? డైలాగులు పలకలేని ఓ యువకుడు తన ప్రేమ కోసం ఎంత దూరమైనా వెళ్లగలడా? అదే సమయంలో వెయ్యి కోట్ల హవాలా డబ్బు, ఓ పెన్డ్రైవ్, గ్యాంగ్‌స్టర్ల వేట.. ఇలాంటి ఆసక్తికరమైన అంశాలతో తెరకెక్కిన చిత్రం ‘ఇట్లు అర్జున’. కొత్త హీరో అనీష్ రెడ్డి, మలయాళ బ్యూటీ అనస్వర రాజన్ జంటగా నటించిన ఈ సినిమాకు మహేష్ ఉప్పల దర్శకత్వం వహించారు. వెంకీ కుడుముల నిర్మించగా, అక్కినేని నాగార్జున సమర్పకుడిగా వ్యవహరించారు. విడుదలకు ముందే ఎన్టీఆర్, రామ్ చరణ్, అఖిల్ వంటి స్టార్ హీరోల ప్రమోషన్స్‌తో మంచి బజ్ క్రియేట్ చేసుకున్న ఈ సినిమా, ఇవాళ నవంబర్13, 2026న థియేటర్లలోకి వచ్చింది. ప్రీమియర్ షోల నుంచే పాజిటివ్ టాక్ అందుకున్న ఈ మూవీ ప్రేక్షకుల అంచనాలను ఎంతవరకు అందుకుంది? కొత్త హీరో అనీష్ తన తొలి సినిమాతో ఎలాంటి ఇంపాక్ట్ క్రియేట్ చేశాడు? అనస్వర రాజన్‌తో కెమిస్ట్రీ ఎలా ఉంది? థమన్ తన మ్యూజిక్‌తో మ్యాజిక్ చేశాడా? చూద్దాం.
కథేంటంటే?
మాటలు రాని యువకుడు అర్జున్‌ (అనీష్) చిన్నప్పటి నుంచే దొంగతనాలు చేస్తుంటాడు. అయితే అతడి మనసులో మాత్రం పక్కింటి అమ్మాయి కీర్తి (అనస్వర రాజన్)పై ప్రేమ ఉంటుంది. ఆమెకు దగ్గరవ్వాలని ప్రయత్నిస్తున్న సమయంలో ఇద్దరికీ పరిచయం ఏర్పడి, అది ప్రేమగా మారుతుంది. కానీ అనుకోకుండా వీరి జీవితాల్లోకి రూ.1000 కోట్ల హవాలా వ్యవహారం ప్రవేశిస్తుంది. ఇక్కడే కథలోకి ఎంట్రీ ఇస్తాడు పెద్దన్న (ముఖేష్ రిషి). అలా పెద్దన్న అనే గ్యాంగ్స్టర్ నడిపించే ఈ వ్యవహారానికి సంబంధించిన కీలక సమాచారం ఓ పెన్‌డ్రైవ్‌లో ఉంటుంది. దాన్ని చేజిక్కించుకునేందుకు పెద్దన్న గ్యాంగ్‌తో పాటు పోలీస్‌ అధికారి ఇరానీ (ఎలాంగో కుమరవేల్‌) కూడా రంగంలోకి దిగుతారు. ఈ ప్రమాదకరమైన వ్యవహారంలో చిక్కుకున్న అర్జున్‌, కీర్తి ఎలా బయటపడ్డారు? తమ ప్రేమను ఎలా నిలబెట్టుకున్నారు? అన్నదే మిగతా కథ.
విశ్లేషణ:
మాటలు రాని ఓ యువకుడి ప్రేమకథకు గ్యాంగ్స్టర్ క్రైమ్ డ్రామాను జోడించడం ‘ఇట్లు అర్జున’లో ఆసక్తికరమైన అంశం. ఈ రెండు భిన్నమైన ట్రాక్‌లను దర్శకుడు మహేష్ ఉప్పల ఎలా ముడిపెట్టాడన్నదే సినిమా ప్రత్యేకత. ముఖ్యంగా మాటలు లేకుండానే తన భావాలను పలికించే హీరో పాత్రను డిజైన్ చేసిన తీరు కొత్తగా అనిపిస్తుంది. సాధారణంగా హీరో పరిచయ చిత్రాల్లో కథానాయకుడి ఎలివేషన్లకు ఎక్కువ ప్రాధాన్యం ఇస్తుంటారు. కానీ 'ఇట్లు అర్జున'లో దర్శకుడు హీరో పాత్రనే కథకు ప్రధానమైన ఆసక్తికరమైన అంశంగా మలిచాడు. మాటలు రాని వ్యక్తి అనే పరిమితిని కేవలం సెంటిమెంట్ కోసం ఉపయోగించకుండా, కథలోని అనేక కీలక సందర్భాలకు అనుసంధానించడం మంచి ఆలోచన.
ఫస్టాఫ్‌ విషయానికొస్తే సినిమా మంచి జోష్‌తో సాగుతుంది. అర్జున్‌ పాత్ర పరిచయం, కీర్తితో అతడి పరిచయం, ఇద్దరి మధ్య జరిగే సరదా సన్నివేశాలు ఆహ్లాదాన్ని పంచుతాయి. హీరో ఎక్స్‌ప్రెషన్స్‌, బాడీ లాంగ్వేజ్‌ ఆధారంగా నడిచే సీన్లు బాగానే వర్కవుట్‌ అయ్యాయి. హీరోహీరోయిన్ల కెమిస్ట్రీ కూడా లవ్‌ ట్రాక్‌కు మంచి బలాన్నిస్తుంది. మరోవైపు పెన్డ్రైవ్, పాస్‌వర్డ్‌, పెద్దన్న గ్యాంగ్ చుట్టూ నడిచే క్రైమ్ ట్రాక్‌ కథలో ఉత్కంఠను పెంచుతుంది. లవ్‌, కామెడీ, క్రైమ్ అంశాలను కలగలిపి దర్శకుడు కథనాన్ని ఆసక్తికరంగా నడిపించాడు. వెన్నెల కిషోర్‌ కామెడీ అక్కడక్కడా మంచి రిలీఫ్‌ ఇస్తుంది. ఇంటర్వెల్‌ ముందు వచ్చే ట్విస్టులు సెకండాఫ్‌పై అంచనాలు పెంచుతాయి.
సెకండాఫ్‌లో కథ మరింత సీరియస్‌ మోడ్‌లోకి వెళ్లడంతో ఎమోషన్స్‌, యాక్షన్‌కు ప్రాధాన్యం పెరుగుతుంది. పెద్దన్న గ్యాంగ్ నుంచి తప్పించుకునేందుకు అర్జున్‌ చేసే ప్రయత్నాలు, తనకున్న తెలివితేటలతో ఎదురయ్యే సవాళ్లను అధిగమించే తీరు ఆకట్టుకుంటాయి. ముఖ్యంగా క్లైమాక్స్‌కు ముందు వచ్చే చివరి 30-40 నిమిషాలు సినిమాకు మంచి హై ఇస్తాయి. పెద్దన్న అడ్డాలో జరిగే యాక్షన్‌ ఎపిసోడ్స్‌కు థమన్ బ్యాక్గ్రౌండ్ స్కోర్‌ మరింత బలాన్ని చేకూరుస్తుంది. కథలోని కొన్ని మలుపులు ముందే ఊహించేలా ఉన్నప్పటికీ, ప్రేమకథలోని అమాయకత్వం, క్రైమ్ డ్రామాలోని ఉత్కంఠ సినిమాను ఆసక్తికరంగా నడిపిస్తాయి.
అదే సమయంలో వెయ్యి కోట్ల హవాలా వ్యవహారాన్ని పూర్తిగా ముగించకుండా సస్పెన్స్‌లో ఉంచడం సీక్వెల్‌పై ఆసక్తిని పెంచుతుంది. మొత్తంగా ప్రేమ, కామెడీ, యాక్షన్‌, క్రైమ్ అంశాలను కలిపి ఓ కొత్త తరహా కథను చెప్పాలన్న దర్శకుడి ప్రయత్నం మెప్పిస్తుంది. ముఖ్యంగా హీరో పాత్రలోని ప్రత్యేకత, అనీష్ నటన, అనస్వర రాజన్‌తో కెమిస్ట్రీ, వెన్నెల కిషోర్‌ కామెడీ సినిమాకు ప్రధాన బలాలుగా నిలుస్తాయి. ఫస్టాఫ్‌ నుంచి క్లైమాక్స్‌ వరకు ప్రేక్షకులను ఎంగేజ్‌ చేసే ఎలిమెంట్స్ ‘ఇట్లు అర్జున’కు ప్లస్‌గా నిలుస్తాయి.
నటీనటులు ఎలా చేశారు?
అనీష్ మాటలు రాని యువకుడిగా ఎక్స్‌ప్రెషన్స్‌, బాడీ లాంగ్వేజ్‌తో ఆకట్టుకున్నాడు. ప్రేమ, బాధ, ఆవేశం వంటి భావాలను చక్కగా పలికించి హీరోగా మంచి ఆరంభాన్ని అందుకున్నాడు. కీర్తి పాత్రలో అనస్వర రాజన్ సహజమైన నటన, చలాకీ ఎక్స్‌ప్రెషన్స్‌తో మెప్పించింది. వీరిద్దరి కెమిస్ట్రీ బాగుంది. వెన్నెల కిషోర్‌ తన కామెడీ టైమింగ్‌తో నవ్వులు పంచాడు. పెద్దన్నగా ముఖేష్ రిషి తన స్క్రీన్‌ ప్రెజెన్స్‌తో ఆకట్టుకున్నారు. కలైయరసన్‌, ఎలాంగో కుమరవేల్‌, బ్రహ్మాజీ, గెటప్‌ శ్రీను తదితరులు తమ పాత్రల పరిధిలో మెప్పించారు.
టెక్నికల్ విభాగం..
థమన్ సంగీతం, ముఖ్యంగా బ్యాక్గ్రౌండ్ స్కోర్‌ సినిమాకు ప్రధాన బలంగా నిలిచింది. రాజా మహాదేవన్ సినిమాటోగ్రఫీ ప్రేమ, క్రైమ్ సన్నివేశాలకు చక్కని విజువల్‌ అప్పీల్‌ తీసుకొచ్చింది. నిర్మాణ విలువలు బాగున్నాయి. ఎడిటింగ్‌ మరింత షార్ప్‌గా ఉంటే సెకండాఫ్‌ వేగం పెరిగేది. కొత్త పాయింట్‌ను ఎంచుకున్న దర్శకుడు మహేష్ ఉప్పల ప్రేమ, కామెడీ, థ్రిల్‌ అంశాలతో మంచి కమర్షియల్‌ ఎంటర్‌టైనర్‌ అందించే ప్రయత్నం చేశారు.
