న్యూఢిల్లీ: అంబానీ కుటుంబం జియో ఫైనాన్షియల్ సర్వీసెస్ (జేఎఫ్ఎస్లో) లో రూ. 15,825 కోట్లు (దాదాపు రూ. 16,000 కోట్లు) పెట్టుబడి పెట్టనుంది. ప్రమోటర్ల గ్రూప్ సభ్యులకు కన్వర్టిబుల్ వారెంట్ల ప్రిఫరెన్షియల్ ఇష్యూ ద్వారా నిధుల సమీకరణకు కంపెనీ బోర్డు బుధవారం ఆమోదం తెలిపింది.
ఈ పెట్టుబడితో కంపెనీలో ప్రమోటర్ల వాటా 47.12 శాతం నుంచి 54.19 శాతానికి పెరుగుతుంది. ఈ నిధులను జియో ఫైనాన్షియల్ తన ఆర్థిక సేవల వ్యాపారాన్ని విస్తరించడానికి, ప్రత్యర్థులకు గట్టి పోటీ ఇవ్వడానికి ఉపయోగించనుంది. జియో ఫైనాన్షియల్ ప్రస్తుతం పెట్టుబడులు, లోన్లు, బీమా బ్రోకింగ్, చెల్లింపు సేవలను అందిస్తోంది. ఈ భారీ నిధుల సమీకరణ భవిష్యత్తు విస్తరణ ప్రణాళికలకు బలం చేకూరుస్తుందని కంపెనీ వర్గాలు తెలిపాయి.
