వనపర్తి టౌన్, వెలుగు: మీ సేవా ఆపరేటర్లకు ఉద్యోగ భద్రత కల్పించి ఆదుకోవాలని మీసేవ యూనియన్ జిల్లా అధ్యక్షుడు పోతులపల్లి శివకుమార్, గౌరవ అధ్యక్షుడు బుచ్చయ్య, ప్రధాన కార్యదర్శి ప్రభాకర్ కోరారు. ఆదివారం జిల్లా కేంద్రంలో మీసేవా ఆపరేటర్ల సమావేశం నిర్వహించారు.
ఈ సందర్భంగా వారు మాట్లాడుతూ బీఆర్ఎస్ పాలనలో ఇంటర్నెట్ సెంటర్లలో ఆన్లైన్ సేవలు అందించడంతో మీసేవ కేంద్రాల నిర్వహణ ఇబ్బందిగా మారిందన్నారు. ధరణి ఆన్లైన్ సేవలతో మీ సేవలో ఉన్న ఆర్ఓఆర్, పహాణి, ఓటర్ ఐడీ డౌన్లోడ్ తదితర సర్వీసులను మీసేవ నుంచి వేరు చేయడంతో నిర్వీర్యమయ్యాయని ఆవేదన వ్యక్తం చేశారు. శ్రీనివాస్, చక్రవర్తి, శేఖర్, బాలరాజు, ఈశ్వర్, యుగంధర్, బాలరాజు, శ్రావణ్ కుమార్, అరుణ్ చందర్, అంజి, గంగన్న పాల్గొన్నారు.
