బ్రెడ్ను చాయ్ లో ముంచుకుని తింటారు. లేదంటే జామ్, సాస్తో తింటారు. అవీ ఇవీ కాదంటే షాపులో నుంచి శాండ్విచ్ తెచ్చుకుని లాగిస్తారు. అలా కాకుండా బ్రెడ్తో రకరకాల వంటకాలుకూడా చేసుకోవచ్చు. బ్రెడ్ వడలు, పకోడీలు ఎలా తయారీకి ఏఏ పదార్ధాలు కావాలి.. ఎలా తయారు చేయాలో ఈ స్టోరీలో తెలుసుకుందాం..!
పనీర్ బ్రెడ్ పకోడా తయారీకి కావలసినవి
- పనీర్ తురుము-1 కప్పు
- క్యారెట్ తురుము -పావు కప్పు
- ఉడికించిన బరాణీలు- పావు కప్పు
- కారం పొడి - అర టీ స్పూన్
- పసుపు-సరిపడా
- కొత్తిమీర తరుగు -1 టేబుల్ స్పూన్
- ఉప్పు- తగినంత
- శెనగపిండి- ముప్పావు కప్పు
- కారంపొడి-పావు టీ స్పూన్
- ఇంగువ - చిటికెడు
- బ్రెడ్ ముక్కలు - 4
- నూనె - సరిపడా
తయారీ విధానం : ముందుగా ఒక గిన్నెలో పనీర్ తురుము, క్యారెట్ తురుము, ఉడికించిన బఠాణీలు తీసుకోవాలి. అందులో కారం పొడి, పసుపు, ఉప్పు, కొత్తిమీర తరుగు వేసి కలపాలి. అలాగే మరోవైపు ఇంకో గిన్నెలో శెనగపిండి తీసు కోవాలి. అందులో పసుపు కొద్దిగా కారం, ఇంగువ, ఉప్పు, సరిపడా నీళ్లు పోసి జారుగా కలపాలి. ఒక బ్రెడ్ ముక్కను తీసుకుని, దాని మీద పనీర్ మిశ్రమాన్ని పెట్టాలి. మళ్లీ దానిపై ఇంకో బ్రెడ్ ను పెట్టాలి. అలా అన్నింటినీ చేశాక వాటిని త్రిభుజాకారం వచ్చేలా కట్ చేయాలి. ఆ ముక్కలను శెనగపిండి మిశ్రమంలో ముంచి నూనెలో డీప్ ఫ్రై చేయాలి. ఏదైనా సాస్ లేదా చట్నీతో తింటే బాగుంటుంది..
బ్రెడ్ మేదూ వడ తయారీకి కావలసినవి
- బ్రెడ్ ముక్కలు -6
- పెరుగు- ముప్పావు కప్పు
- బియ్యప్పిండి - అర కప్పు
- ఉప్మారవ్వ - పావు కప్పు
- జీలకర్ర - అర టీ స్పూన్
- ఉల్లిగడ్డ తరుగు–అర కప్పు
- అల్లం తరుగు - అర టీ స్పూన్
- కొత్తిమీర తరుగు - పావు కప్పు
- కరివేపాకు రెమ్మ-1
- పచ్చిమిర్చి తరుగు - 1 టీ స్పూన్
- ఉప్పు - తగినంత
తయారీ విధానం :ముందుగా ఒక గిన్నెలో బ్రెడ్ ముక్కలను చిదిమి పొడి పొడిగా చేయాలి. తర్వాత ఇందులోనే బియ్యప్పిండి, ఉప్మారవ్వు.. పచ్చిమిర్చి తరుగు, పెరుగు, జీలకర్ర, ఉల్లిగడ్డ తరుగు అల్లం తరుగు, కరివేపాకు, కొత్తిమీర తరుగు, ఉప్పు వేయాలి. మిశ్రమం. మరీ పొడిగా ఉందనుకుంటే మరోటీ స్పూన్ పెరుగు వేసి కలపాలి. ఇప్పుడు మిశ్రమాన్ని కొద్దికొద్దిగా చేతుల్లోకి తీసుకొని వడల్లా వత్తాలి. తర్వాత వాటన్నింటినీ నూనెలో డీప్ ఫ్రై చేయాలి. వేడివేడిగా ఉన్నప్పుడే... ఏదైనా చట్నీ లేదా సాంబార్ తో తినాలి. . .
