- వరదలు వచ్చేలోపు పనులు కంప్లీట్ చేయాలని ప్రభుత్వం టార్గెట్
- మేడిగడ్డ, అన్నారం, సుందిళ్ల బ్యారేజీ రిపేర్లపై కసరత్తు ముమ్మరం
- బేషరతుగా పనులు చేసేందుకు ఒప్పుకున్న ఎల్అండ్ టీ
- రాత్రింబవళ్లూ బ్యారేజీలకు రిపేర్లు చేయనున్న నిర్మాణ సంస్థ
- సీఎం పర్యటన నేపథ్యంలో అధికారులతో మంత్రి ఉత్తమ్ సమీక్ష
హైదరాబాద్, వెలుగు : కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల పనులను జూన్ 30లోపు యుద్ధ ప్రాతిపదికన పూర్తి చేసేందుకు ప్రభుత్వం టార్గెట్ పెట్టుకున్నది. ఇందులో భాగంగాఇరిగేషన్ అధికారులు కసరత్తు ముమ్మరం చేశారు. ఫ్లడ్ వచ్చేలోపు రాత్రింబవళ్లూ పనులు చేయాలని నిర్ణయించారు. అందుకు నిర్మాణ సంస్థ ఎల్అండ్ టీ కూడా అంగీకరించినట్టు అధికారులు చెప్తున్నారు. గురువారం సెక్రటేరియెట్లో ఇరిగేషన్శాఖ అధికారులు, సీడబ్ల్యూపీఆర్ఎస్ నిపుణులు, ఎల్ అండ్ టీ ప్రతినిధులతో మంత్రి ఉత్తమ్ కుమార్ రెడ్డి సమీక్ష నిర్వహించారు.
ఈ సమావేశంలో ఇరిగేషన్ సెక్రటరీ రాహుల్ బొజ్జా, స్పెషల్ సెక్రటరీ ప్రశాంత్ జీవన్ పాటిల్, ఈఎన్సీ (జనరల్) అనిల్కుమార్, ఈఎన్సీ (ఓ అండ్ ఎం) నాగేందర్ రావు, ఎల్ అండ్ టీ ప్రతినిధులు పాల్గొన్నారు. బ్యారేజీలు, పంప్హౌస్ల వద్దకు సీఎం రేవంత్ రెడ్డి వచ్చే వారం వెళ్లనున్న నేపథ్యంలో పనులు సాగుతున్న తీరుపై అధికారులను మంత్రి ఆరా తీశారు. వరదలు వచ్చే లోపు పనులు పూర్తి చేసేలా చర్యలు చేపట్టాలని ఆదేశించారు.
ఈ పనులే ప్రయారిటీ..
బ్యారేజీలో వాస్తవానికి సీకెంట్ పైల్స్, రాఫ్ట్లు కలిపి ఉంటాయని అధికారులు పేర్కొన్నారు. అయితే, వాటిని జస్ట్ జాయింట్స్లాగా చేయడంతోనే పిల్లర్లు, రాఫ్ట్, షీట్పైల్స్కింద ఇసుక కొట్టుకుపోవడం వల్ల బ్యారేజీ కుంగిందని చెప్తున్నారు. ప్రస్తుతం బ్యారేజీ మరింత డ్యామేజ్ కాకుండా ఉండాలంటే రాఫ్ట్, పిల్లర్ల కింద ఉన్న గ్యాప్ను ఫిల్ చేయడమే అత్యంత ప్రాధాన్యమైన పని అని స్పష్టం చేస్తున్నారు. రాఫ్ట్ దగ్గర ఓ రంధ్రం చేసి.. ఇసుక, ఇతర మిశ్రమాలను ప్రెజర్ ద్వారా ఖాళీల్లో నింపాలని నిర్ణయించారు. ఆ తర్వాత కొట్టుకుపోయిన ప్రదేశాలు, దెబ్బతిన్న ప్రాంతాల్లో షీట్పైల్స్ను రీప్లేస్ చేస్తామని చెప్తున్నారు.
ఈ పనులయ్యాక గేట్లను ఎత్తుతామని వెల్లడించారు. ఎత్తలేని పరిస్థితి ఉన్న గేట్లను పూర్తిగా తొలగించేందుకు ఏర్పాట్లు చేస్తున్నట్టు వివరించారు. రాత్రి, పగలు తేడా లేకుండా పనులు చేసి జూన్ 30 లోపు ఎంత పనులైతే అంత వరకు చేయాలని డిసైడ్ అయ్యారు. మరోవైపు మేడిగడ్డ బ్యారేజీలో పనులు చేసే చోట వరద రాకుండా తాత్కాలికంగా అడ్డుకట్ట కట్టి, పనులు చేపడతామని అధికారులు చెప్పారు. బ్యారేజీలను కాపాడుకునేలా చర్యలు చేపట్టి.. వచ్చే సీజన్లో నీళ్లను తోడిపోసుకునేలా చూడాలని మంత్రి ఉత్తమ్ కుమార్ రెడ్డి అధికారులను ఆదేశించినట్టు తెలిసింది.
పనులు చేసేందుకు ఎల్అండ్టీ ఓకే
బ్యారేజీల రిపేర్లను చేపట్టేందుకు నిర్మాణ సంస్థ ఎల్అండ్ టీ బేషరతుగా ఒప్పుకున్నట్టు తెలిసింది. తొలుత కొత్తగా ఒప్పందం చేసుకునేదాకా పనులు చేయబోమని సంస్థ చెప్పింది. అయితే, పనులు చేయకుంటే క్రిమినల్ కేసులకూ వెనుకాడొద్దని సీఎం ఆదేశించిన సంగతి తెలిసిందే. ఈ నేపథ్యంలోనే అదే విషయాన్ని ఎల్ అండ్ టీ ప్రతినిధులకు మంత్రి ఉత్తమ్, అధికారులు స్పష్టం చేశారు. దీంతో గోదావరికి వరదలు స్టార్ట్ అయ్యేలోపు పనులను పూర్తి చేసేలా సంస్థ అంగీకరించినట్టు సమాచారం. వీలైనంత త్వరగా పూర్తిచేసేలా డే అండ్ నైట్ పని చేస్తామని చెప్పినట్టు తెలిసింది.
మరోవైపు బ్యారేజీలను పరిశీలించిన సెంట్రల్ వాటర్ అండ్ పవర్ రీసెర్చ్ స్టేషన్ (సీడబ్ల్యూపీఆర్ఎస్) నిపుణులు.. బ్యారేజీలకు జరిగిన డ్యామేజీ తీవ్రంగా ఉందని అధికారులతో చెప్పినట్టు తెలిసింది. ఈ నేపథ్యంలోనే ప్రాధాన్యతా క్రమంలో వీలైనంత త్వరగా మూడు బ్యారేజీల వద్ద తమ పనులను ప్రారంభిస్తామని హామీ ఇచ్చినట్టు సమాచారం. సోమవారం నుంచి ఆయా బ్యారేజీల వద్ద సంస్థ నిపుణులు ఇన్వెస్టిగేషన్స్ ప్రారంభిస్తారని తెలుస్తున్నది. ఇటు రిపేర్ల పనులు జరుగుతుండగానే టెస్టులు కూడా చేసేలా ఏర్పాట్లు చేస్తున్నారు.
జూన్ 6న జస్టిస్ పీసీ ఘోష్ రాక
ప్రాజెక్ట్ అవకతవకలపై ఏర్పాటైన జ్యుడీషియల్ కమిషన్ కూడా విచారణను మరింత వేగవంతం చేయనున్నది. జూన్ 6న కమిషన్ చైర్మన్ జస్టిస్ పినాకి చంద్రఘోష్ (పీసీ ఘోష్) రానున్నట్టు అధికారులు చెప్తున్నారు. ఈసారి పది రోజుల పాటు ఇక్కడే ఉండి విచారణ చేయనున్నట్టు తెలుస్తున్నది. అప్పటికి ఎన్నికల రిజల్ట్ వచ్చేసి కోడ్ కూడా ముగుస్తుండడంతో.. విచారణను మరింత వేగంగా చేస్తారని అధికారులు చెప్తున్నారు. అప్పుడే జ్యుడీషియల్ కమిషన్ ఆఫీసు వద్ద ఏర్పాటు చేసిన సజెషన్ బాక్సులోని ఫిర్యాదులను పరిశీలించనున్నారు. అవసరాన్ని బట్టి ఎవరెవరిని విచారణకు పిలవాలన్నది నిర్ణయించనున్నారు.
