హైదరాబాద్, వెలుగు: కాళేశ్వరం ప్రాజెక్టుకు సంబంధించిన పనులన్నీ నాలుగు నెలల పాటు పూర్తిగా నిలిచిపోనున్నాయి. ఓవైపు రాష్ట్ర ప్రభుత్వం విజిలెన్స్ విచారణ చేస్తుండగా.. మరోవైపు మేడిగడ్డ, అన్నారం, సుందిళ్ల బ్యారేజీల నిర్మాణం, డిజైన్లపై అధ్యయనానికి నేషనల్ డ్యామ్ సేఫ్టీ అథారిటీ నిపుణుల కమిటీని నియమించింది. ఈ కమిటీ వేయా లని రాష్ట్ర ప్రభుత్వమే కోరింది. దీంతో ఆ కమిటీ చేసే సూచనలకు అనుగుణంగానే ప్రభుత్వం ముందుకు వెళ్లనుంది. ఇప్పటికే నీళ్లు నిల్వ లేకుండా చూసుకోవాలని కమిటీ చెప్పడంతో బ్యారేజీలను ఖాళీ చేశారు. ఏవైనా మరమ్మతులు చేయాలన్నా ఎక్స్పర్ట్కమిటీ రిపోర్ట్ ఆధారంగానే ముందుకు వెళ్లాల్సి ఉండటంతో అప్పటి దాకా ఎలాంటి పనులు చేపట్టబోమని ఇంజనీర్లు చెబుతున్నారు.
