- కేంద్ర సహాయ మంత్రి బీఎల్ వర్మ
భద్రాచలం, వెలుగు: రాముడికి రూ.100 కోట్లు ఇస్తానని చెప్పి మొండి చెయ్యి చూపించి మోసం చేసిన చరిత్ర సీఎం కేసీఆర్ది అని కేంద్ర సహాయ మంత్రి బీఎల్ వర్మ అన్నారు. సోమవారం భద్రాచలం శ్రీసీతారామచంద్రస్వామి దేవస్థానంలో ప్రత్యేక పూజలు చేసిన అనంతరం మీడియాతో మాట్లాడారు. శ్రీరామనవమి సందర్భంగా సీతారాముల కల్యాణానికి పట్టువస్త్రాలు, తలంబ్రాలు తీసుకురాని సీఎం కేసీఆరేనని ఎద్దేవా చేశారు. రామాలయం మాస్టర్ ప్లాన్ ఎటు పోయిందని ప్రశ్నించారు. రామాయణం సర్క్యూట్లో రామాలయం అభివృద్ధికి నిధులు కేటాయిస్తే డీపీఆర్ కూడా ఇవ్వలేదని విమర్శించారు. దీంతో కేంద్ర ప్రభుత్వమే ప్రసాద్ పథకంలో రూ.100 కోట్లు కేటాయించిందని, రూ.41 కోట్లు రిలీజ్ చేసిందని చెప్పారు. కాంగ్రెస్ హయాంలో రూ.11.55 లక్షల కోట్ల అవినీతి జరిగిందని ఆరోపించారు. అవినీతికి అడ్డుకట్ట వేసేందుకే 45 కోట్లకు పైగా జన్ధన్ ఖాతాలను తెరిచారని గుర్తు చేశారు. కేంద్ర పథకాలు ప్రజలకు అందకుండా తెలంగాణ సర్కారు అడ్డుపడుతుందని విమర్శించారు. రైతులకు వ్యవసాయ బీమా అమలు చేసినా, తెలంగాణ అందుకు ముందుకు రావడం లేదన్నారు. ఎన్నికల సమయంలో రుణమాఫీ హామీ ఇచ్చి కేసీఆర్ మాట తప్పారని చెప్పారు. తెలంగాణలో డబుల్ ఇంజన్ సర్కార్ వస్తేనే మరింత డెవలప్ అవుతుందని తెలిపారు. అనంతరం సుభాష్నగర్ ముంపు కాలనీతో పాటు గోదావరి కరకట్టను పరిశీలించి వరదల సమయంలో జరిగిన నష్టాన్ని అడిగి తెలుసుకున్నారు. ఆయన వెంట బీజేపీ లీడర్లు కుంజా సత్యవతి, ఎర్రంరాజు బెహరా, ప్రభాకర్రెడ్డి, రాకేశ్పాల్గొన్నారు.
వచ్చేది డబుల్ఇంజన్ సర్కరే..
ఇల్లందు: రాష్ట్రంలో వచ్చేది డబుల్ఇంజన్ సర్కారేనని కేంద్ర మంత్రి బీఎల్ వర్మ ధీమా వ్యక్తం చేశారు. నియోజకవర్గ ముఖ్య కార్యకర్తల సమావేశంలో ఆయన మాట్లాడుతూ కేంద్ర ప్రభుత్వ పథకాలను ప్రజల్లోకి తీసుకెళ్లేందుకే ప్రతి ఒక్కరూ కృషి చేయాలన్నారు. రాష్ట్రంలోని ప్రైవేట్ ఆసుపత్రుల యాజమాన్యాలతో కుమ్మక్కై ఆయుస్మాన్ భారత్ స్కీమ్ను ప్రజలకు అందకుండా చేస్తున్నారని విమర్శించారు. అవినీతి, కుటుంబపాలన నడుస్తుందని దీనిని పక్కకు పెట్టాల్సిన సమయం వచ్చిందని చెప్పారు. ఇల్లందు నియోజకవర్గ కన్వీనర్ గోపికృష్ణ గౌడ్, జిల్లా ఇన్చార్జి రాకేశ్ రెడ్డి, నియోజకవర్గ ఇన్చార్జి రాజవర్ధన్రెడ్డి, జిల్లా అధ్యక్షుడు కోనేరు చిన్ని పాల్గొన్నారు.
