- ఆ నలుగురే తెలంగాణను పాలిస్తున్నరు
- దేశానికి కేరళ మోడల్ ఆదర్శం
- సీపీఎం పొలిట్బ్యూరో మెంబర్ విజయరాఘవన్
భద్రాచలం,వెలుగు: విద్య, వైద్యం, సంక్షేమంపై దృష్టిసారించి పాలన అందిస్తున్న కేరళ మోడల్ దేశానికి ఆదర్శమని, దేశానికి ఇప్పుడు అలాంటి పాలనే కావాలని సీపీఎం పొలిట్బ్యూరో సభ్యులు, మాజీ ఎంపీ విజయరాఘవన్ అన్నారు. కేంద్ర కమిటీ సభ్యుడు వెంకట్తో కలిసి సోమవారం భద్రాచలంలో విలేకర్ల సమావేశంలో మాట్లాడారు. భద్రాచలంలో సీపీఎం అభ్యర్థి కారం పుల్లయ్యను గెలిపించాలని కోరారు. కేసీఆర్, కేటీఆర్, కవిత, హరీశ్రావు...ఆ నలుగురే తెలంగాణను పాలిస్తున్నారని విమర్శించారు.
భద్రాచలానికి తీవ్ర అన్యాయం చేసిన బీఆర్ఎస్, బీజేపీకు ఓట్లు అడిగే హక్కులేదన్నారు. ఐదు గ్రామపంచాయతీలను తెలంగాణలోకి తెచ్చే దమ్ము బీఆర్ఎస్కు లేదా అని ప్రశ్నించారు. కేటీఆర్ భద్రాచలం పర్యటనలో భద్రాచలం ఎదుర్కొంటున్న సమస్యలు ప్రస్తావించకపోవడం దారుణమన్నారు. నవంబరు 25న త్రిపుర రాష్ట్ర మాజీ ముఖ్యమంత్రి మాణిక్సర్కార్..వాజేడు మండలం, భద్రాచలంలో పర్యటిస్తారని, 27న మాజీ రాజ్యసభ మెంబర్బృందాకారత్ ప్రచారంలో పాల్గొంటారన్నారు. మచ్చా వెంకటేశ్వర్లు, రమేశ్, బాలనర్సారెడ్డి, మర్లపాటి రేణుక, సున్నం గంగా, బండారు శరత్బాబు, గడ్డం స్వామి పాల్గొన్నారు.
